Bul - ǵasyrlar boıy babalar ańsap kútken uly qýanysh! Ult muraty. Sol jolda sansyz arystarymyz, asyldarymyz, ardaqtylarymyz shahıt boldy. Sondyqtan bul bostandyq - joıdaýsyz tógilgen qannyń, qyrshynynan qıylǵan qanshama jannyń bodaýy.
Basymyzdan toqpaq ketip, aýyzymyzdan qaqpaq alynyp, azattyqtyń saf aýasymen erkin tynystap, kerege jaıyp, keń kósilip ómir súrý qandaı baqyt! Azattyqtyń qadirin elin súıgen erler ǵana tereń sezinedi, basynan altyn quısań da búlk etpeıtin bezbúırekterge báribir. Sonaý kóne zamandardan búginge jalǵasqan tirshiligimizde halqymyz orda tutqan Ordabazar, Balasaǵun, Saraıshyq, Saýran, Túrkistan sııaqty talaı tarıhı qalalar boldy. Alaıda, Táýelsizdiktiń týyn tige salysymen Tuńǵysh Prezıdentimiz Nursulan Ábishulynyń bastaýymen Alataýdan Arqaǵa kóshken astananyń jóni bólek. Otyz jyl ishinde irgemizdi bekitip, eńsemizdi tiktedik. Qazaqty álem tanydy. Ras, aýmaly-tókpeli, bılikke ókpeli alasapyran kúnder de ótti. Onyń kýási – keshegi qańtar qasireti. Jan jarasy jasyrǵanmen jazylmaıdy. Shyndyqtyń betine týra qaraýymyz kerek. Sonda ǵana uly tarıh aldynda uıalmaımyz!
Tarıh biryńǵaı jarqyn betterden turmaıdy. Basymyzdan ótken otyz jyl ózgeniń emes ózimizdiń tarıhymyz. Ony ádil baǵalaı bilgenimiz jón. «Jańa Qazaqstan» búginnen bastalmaıdy, kesheginiń zańdy jalǵasy. Tarıhı sabaqtastyq úzilgen jerde kez-kelgen kósh tuıyqqa tireledi. Biz oǵan urynbaýymyz kerek. Keńinen oılap, keń pishkende ǵana keleshegimiz jarqyn bolmaq. Nur-Sultan qalasynyń ákimi Altaı Kólginovtiń qoldaýymen, Sáken Seıfýllın mýzeıiniń uıymdastyrýymen qalanyń mereıli merekesine oraı jarııalanyp otyrǵan «Eńsesi bıik – elorda» atty bul músháıranyń maqsat-múddesi de osyǵan saıady.
On jyldan beri ótip kele jatqan dástúrli bul múshaıraǵa talaı talanttar qatysyp júldeli bolǵanyn eske alsaq, bıyl da qalamy júırik, qarymy qýattylar jyr dodasyna belsene qatysady dep oılaımyz. Taqyryp aıasynyń kókjıegi keń. Shynaıy jyrlap, el qasıetin, elorda qadirin qasterleý ár aqynnyń shabyty men shabysyna baılanysty. Jyr máresinde júzdeskenshe, shaıyrlar!
Ozǵandarǵa tómendegideı olja bar:
Bas júlde – 3 000 000 tg.
Birinshi oryn – 2 000 000 tg.
Ekinshi oryn ekeý – 1 000 000 teńgeden.
Úshinshi oryn úsheý – 500 000 teńgeden.
Yntalandyrý beseý – 250 000 teńgeden.
Músháıraǵa eshjerde jaryq kórmegen tolǵaýlar, toptama óleńder 2022 jyldyń maýsym aıynyń 10-na deıin qabyldanady. Qorytyndysy qala kúni qarsańynda shyǵyp, marapattaý rásimi ótedi.
Úmitkerler shyǵarmasyn kompıýterde terip, astanakalamger@mail.ru elektrondy poshtaǵa joldaýǵa tıis. Qazposhta arqyly da jibere alady.
Avtordyń aty-jóni, meken-jaıy, baılanys telefony, elektrondy poshtasy mindetti túrde kórsetilýi kerek.
Indeks: 010000, Nur-Sultan qalasy. M.Áýezov kóshesi 20 «a» úı. Sáken Seıfýllın mýzeıi. Tel: + 7 775 692 37 30
Eskertý: Kelip-ketý shyǵynyn júldegerlerdiń ózderi kóteredi.
Uıymdastyrý alqasy
