Sharany Ál-Farabı atyndaǵy QazUÝ-dyń jýrnalıstıka fakýltetiniń dekany Sansyzbaı Mádıev ashyp, el múddesine qyzmet etken, halqynyń mádenıeti men tilin dáriptep ótken tulǵany máńgi este qaldyrý maqsatynda iske asatyn sharalar barysyna toqtaldy.
Alǵashqy bolyp sóz alǵan ýnıversıtettiń birinshi prorektory mindetin atqarýshy Qanatbek Muqanov ulttyq baspasózimizdiń órkendeýine úlken eńbek sińirgen tulǵanyń shyǵarmashylyǵyn óskeleń urpaqqa, bolashaq jýrnalısterge úlgi etip, ónege tutý maqsatynda jýrnalıstıka fakýltetinde uıymdastyrylyp otyrǵan «Shaımerdenov oqýlary» is-sharasynyń aıasyn keńeıtýdi, oǵan jastardy meılinshe kóbirek qatystyrý máselesin qozǵady.
Alqaly jıynǵa qatysqan Almaty qalasy ákiminiń orynbasary Arman Qyryqbaev memleketshil tulǵanyń jaıdary minezi, jastarǵa aqylshy retindegi janashyrlyǵy týraly aıta kelip, Joǵarǵy Keńeste baspasóz hatshysy, Prezıdent Ákimshiliginde, Parlamentte, Mádenıet jáne aqparat mınıstrligindegi jaýapty qyzmetterde júrgeninde jaýapkershilikti, mádenıetti hám bilikti, bilimdi tulǵa retinde daralanyp turatyndyǵyn eske aldy.
Alqaly jıynǵa qonaq retinde shaqyrylǵan E.Shaımerdenulynyń jubaıy Kúlásh Shaımerdenova, fılologııa ǵylymdarynyń doktory, professor, jazýshy Káken Qamzın, Qazaqstannyń eńbek sińirgen qaıratkeri Qaınar Oljaı, tanymal telejýrnalıst Gúlmarııa Barmanbekova, Qazaqstan Respýblıkasynyń mádenıet qaıratkeri, Qazaq radıosynyń ardageri Temirhan Mombekuly-Túrkistan, aqyn, jýrnalıst Bekjan Áshirbaev, taǵy basqa qatysýshylar belgili qalamger Erbol Shaımerdenulynyń qoǵammen baılanys ornatý isindegi eńbegin, memleketshil minezin, qaıratkerlik qasıetin tanytar tálimdi áńgimelerin ortaǵa saldy. Osy oraıda kýrstasy Temirhan Mombekuly-Túrkistan «Kýrsta 50 stýdent edik. 41 ul, 9 qyz. Osy qyryq birdiń ishinde adaldyq pen tazalyq jóninen Alpysbaı Shymyrbaıuly men Erboldyń aldyna túsetin eshkim joq bolatyn» degen júrekjardy esteligimen bólise kelip, «Jany taza edi. Prınsıpti máselelerde tek ádiletine qaraı júretin», dep oı tolǵady.
«Shaımerdenov oqýlary» aıasynda halyqaralyq jýrnalıstıka men qoǵamdyq baılanys salasynyń ulttyq jáne jahandyq aqparattyq keńistikte damýy, sıfrlyq medıanyń búgini men bolashaǵy, salalyq jýrnalıstıkanyń ótkeni men búginin saralaýǵa arnalǵan ǵylymı-zertteý jobalarynyń qorytyndysy jarııalanyp, shyǵarmashylyq baıqaýdan oza shapqan stýdentterge E.Shaımerdenuly atyndaǵy shákirtaqy tabys etildi.
ALMATY
