Ońtústik astanada jyl basynan beri jumyssyzdar esebinde turǵandar 17 myńnan asady. Osy oraıda ol jumyspen qamtý jáne jappaı kásipkerlikti damytýdyń 2017-2021 jyldarǵa arnalǵan baǵdarlamasynyń qorytyndysymen tanystyryp, bıyl iske asa bastaǵan kásipkerlikti damytýdyń ulttyq jobasy aıasynda jumyssyzdardy kásiptik oqytýǵa basymdyq berilip otyrǵanyn jetkizdi. Bul maqsatta jumys berýshilerdiń suranysy boıynsha myńnan astam adamdy 25 mamandyq boıynsha oqytý josparlanyp otyr. Jańa bıznes-ıdeıalardy júzege asyryp, kásipkerlerdi qoldaý maqsatynda 400 AEK kóleminde 950 grant qarastyrylǵan. Al 12 aıdan aspaıtyn merzimge áleýmettik jumys oryndary úshin jalaqynyń bir bóligin jumyspen qamtý ortalyǵy óteıdi (belgilengen jalaqy mólsheriniń 35 paıyzy). Bıyl bul baǵytta 980 adamdy qamtý josparlanyp otyr. Sondaı-aq qoǵamdyq jumystarǵa da bir jyl merzimge ýaqytsha jumys oryndaryn qurý kózdelgen. Jumyspen qamtý ortalyǵy jalaqy tólenetin bul baǵytqa bıyl 5 881 adamdy qamtýdy josparlaǵan.
Qalada sonymen qatar jastar men zeınet jasyna deıingi qala turǵyndaryna jumys berý jobasy da júzege asýda. Naqty aıtqanda, «Jastar tájirıbesi», «Alǵashqy jumys orny», «Kúmis jas» jáne t.b. Osy oraıda jastar praktıkasyna alǵan mamandyǵy boıynsha jumys ótili bir jyldan aspaıtyn 29 jasqa tolǵan bilim berý uıymdarynyń túlekteri qatysa alady. Jalaqyny jumyspen qamtý ortalyǵy 30 aılyq eseptik kórsetkishten kem emes mólsherde tóleıdi. Bul – shamamen 122 520 teńge. Baǵdarlamamen osy jyly 1 myń adamdy qamtý josparlanyp otyr.
Spıker 29 jasqa deıingi jastarǵa, onyń ishinde eńbek ótili joq NEET sanatyndaǵy jastarǵa da 18 aıdan aspaıtyn merzimge ýaqytsha «Alǵashqy jumys orny» jobasynyń qarastyrylǵanyn atap ótti. Jumyspen qamtý ortalyǵynan tólenetin jalaqy mólsheri keminde 91 980 teńge. Bul baǵytta bıyl 424 oryn qarastyrylǵan. Al «Urpaqtar úndestigi» jobasy aıasynda 2 jyl ishinde oqýyn aıaqtaǵan, jasy 29-dan aspaǵan bilim berý uıymdarynyń túlekterine 6 aıdan aspaıtyn merzimge ýaqytsha jumys oryndary ashylyp, keminde 91 980 teńge tólenetin bolady. Onymen qamtylatyndardyń sany – 59. Sonymen birge zeınetkerlik jastaǵy jumyssyzdar «Kúmis dáýir» jobasy aıasynda bir jyl ýaqytsha jumysqa ornalasa alady. Oǵan 633 zeınetkerdi qamtý kózdelgen.
Jumyspen qamtý ortalyǵy jumys berýshilermen rekrýtıng jáne maqsatty baǵyttar boıynsha yqpaldastyqta. Elektrondy eńbek bırjasynda myńnan astam habarlandyrý tirkelse, 500-den astam kásiporynda turaqty bos jumys oryndary bar. Tıisti vedomstvo deregine súıensek, jyl basynan beri 11 894, onyń ishinde 3 566 turaqty, 8 328 jumyssyz ýaqytsha jumysqa ornalasqan.
Spıker sonymen qatar, jumyspen qamtý ortalyǵy ataýly áleýmettik kómekti taǵaıyndaýǵa qujattar qabyldaıtynyn jetkizdi. AÁK alýǵa jan basyna shaqqandaǵy ortasha tabysy tómen (búginde bul – 28 616 teńge) azamattar qatysa alady. Jyl basynan beri 4 myńnan astam otbasynan ótinish túsken.
ALMATY
