Álem • 28 Mamyr, 2022

Bakýde birneshe kitaptyń tanystyrý rásimi ótti

47 ret kórsetildi

Halyqaralyq Túrki akademııasy Baký qalasynda uıymdastyrylǵan I Túrki álemi ádebıet jáne kitap festıvali aıasynda Ázerbaıjan baǵytynda jaryq kórgen birneshe kitaptyń tanystyrý rásimin ótkizdi, dep habarlaıdy Egemen.kz.

Atap aıtqanda, kópshilik nazaryna Nızamı Gánjaýıdiń «Jeti arý», «Láıli — Májnún» dastandary qazaqtyń Taır Jarokov, Qasym Amanjolov, Jaqan Syzdyqov, Dıhan Ábilov, Táken Álimqulov qatarly kórnekti aqyndary aýdarmalary negizinde qurastyrylǵan tolyq jınaq retinde usynyldy. Áıgili hamsanyń eki týyndysyn qamtyǵan basylym tanymal ázerbaıjandyq sýretshi Fahraddın Alı Válıoǵlynyń arnaıy salǵan grafıkalarymen bezendirilgen.

Sonymen qatar, Álisher Naýaıdyń Halyqaralyq Túrki akademııasynyń qoldaýymen jaryq kórgen ázerbaıjan tilindegi «Tańdamaly shyǵarmalar» jınaǵyna onyń Hamsasyndaǵy bes dastan tolyǵymen engizilgen. Baký memlekettik ýnıversıteti Túrkologııa kafedrasynyń meńgerýshisi, tanymal túrkolog, doktor Ramız Ásker aýdarǵan áıgili aqyn týyndylary onyń ótken jylǵy mereıtoıy aıasynda ázirlengen bolatyn.

Buǵan qosa, festıval aıasynda Abaı qarasózderiniń Aıda Eıvazova tárjimelegen ázerbaıjan tilindegi basylymy tanystyryldy. Aıta ketý kerek, Túrki akademııasy Abaı Qunanbaıuly shyǵarmalaryn baýyrlas túrki halyqtarynyń tiline aýdaryp basý jumystaryn keńinen júrgizgen bolatyn.

Kitaptardyń tanystyrylym rásimin belgili ázerbaıjandyq jýrnalıst, aýdarmashy Aıda Eıvazova júrgizip otyrdy. Túrki akademııasynyń vıse-prezıdenti Fızýlı Majıdlı, L.Gýmılev atyndaǵy Eýrazııa ulttyq ýnıversıtetiniń professory Amantaı Shárip, ózbekstandyq ǵalym Nýgına Shermýradova, belgili qyrymtatar jazýshysy, jýrnalıst Zera Bekırova, Ázerbaıjan Ulttyq ǵylym akademııasy Nızamı Gánjaýı atyndaǵy Ádebıet ınstıtýtynyń professory Almaz Ýlvı Bınnatova sóz sóılep, paıymdy pikirlerimen bólisti.

 

Sońǵy jańalyqtar

Dollar arzandady

Qarjy • Keshe

Uqsas jańalyqtar