Bul jádigerler «Batys Saryarqa jáne Soltústik Aral boıy saqtarynyń mádenı kesheni: pánaralyq zertteý» granttyq jobasy aıasynda júrgizilgen arheologııalyq jumystar aıasynda, Qyzylorda oblysy Aral aýdany Sekseýil temir jol stansııasy mańyndaǵy Qumsaı turaǵy, Qosaman eskertkishine jáne Aqtóbe oblysy Yrǵyz aýdan ortalyǵynyń mańynda ornalasqan Qabanqulaq – 3 qorymyna júrgizilgen zertteý jumysy barysynda tabylǵan eken.
«Qumsaı turaǵy Termenbes taýyn aınalyp aǵatyn Joǵarǵy beldem ózenge jaqyn barhan-qum arasyndaǵy qýysta ornalasqan. Jumys barysynda 2h2, 1h1 shýrftar qazyldy. Ol jerdiń ashyq qabatynan artefakti tabylmaǵandyqtan, súzgish quraldar arqyly artekfakti sheshimi qabyldandy. Sóıtip, 154 sharshy metr alańǵa 1h1 mm tormen kvadrattyq jınaý tásili júrgizildi. Nátıjesinde, 1500-den astam artefakti súzip alyndy. Olardyń ishinde nýkleýstar, jebelerdiń ushtary, qyrǵyshtar, plastınalar, otshepalar, chıpter jáne ártúrli oıý-órnekteri bar keramıkanyń usaq fragmentteri, t.b. bar. Qum tilimindegi shýrftardyń birinen prokal tabylyp, onyń topyraǵyna flotasııalyq baqylaý júrgizildi», deıdi jumys tobynyń jetekshisi Rústem Dármenov.
Sondaı-aq Qabanqulaq 3 qorǵan-qorymy jańadan zerttelip, arheologııalyq materıaldar qorymnyń Eýrazııa kóshpendileri dáýirine jatatynyn anyqtady. О́kinishke oraı, ótken tarıhtyń jumbaq syrlaryn tolyqtaı anyqtaýǵa qorǵandardyń tonalýy keri áserin tıgizgen kórinedi. Desek te soǵan qaramaı eneolıt jáne erte temir dáýirine tán jádigerler Ulttyq mýzeı qoryn tolyqtyrýmen qatar, atalǵan kezeńderde ómir súrgen halyqtyń turmys-tirshiligimen tanysýǵa múmkindik beredi deıdi mamandar.
