Qabyldaýda bolǵan Aqmola oblysyna qarasty Egindikól aýylynyń turǵyny Svetlana Gýrbanova sýmen jabdyqtaý kezinde týyndap otyrǵan máseleler týraly aıtty. «Sý máselesi burynnan sheshilmeı keledi. Aýylda uńǵyma da, qudyq ta joq, bar úmitimiz tek Nura kanalynda. Mundaǵy jaǵdaı qıyn, aýdan joıylýdyń az-aq aldynda tur. Adamdardyń kóbi bul jerden kóship ketpek, sýsyz qalaı ómir súredi? Osy másele ótken jyly, biz jaz boıy sýsyz otyrǵan kezde shegine jetti. Aptasyna 1-2 ret sý alyp kelip, ár úıge shamamen 200-250 lıtrden beredi. Biraq barlyǵynda birdeı sýdy uzaq ýaqyt saqtaıtyn bóshke de joq», dedi ol.
Bul suraqqa jaýap bergen Ekologııa mınıstrligi Sý resýrstary komıtetiniń tóraǵasy Nurlan Aldamjarov bıyl jobalyq-smetalyq qujattama ázirlenetinin, al Nura toptyq sý qubyryn jóndeýge 2023 jyly kirisetinderin jetkizdi. Mańǵystaý oblysynyń Ońdy aýylynan habarlasqan Basshy Kóbentaev ta eldi mekendegi sý máselesin kóterdi.
Batys Qazaqstan oblysyna qarasty Podstepnoe aýylynyń turǵyny Baıan Tóleýtaeva aýyl balalarynyń áli kúnge deıin úsh aýysymda oqýǵa májbúr ekenin alǵa tartyp, jobalyq-smetalyq qujattamasy daıyn jańa mektep qurylysyn barynsha jyldamdatýdy surady. «Aýylymyz Oraldan 12 shaqyrym jerde ornalasqan. Halyq sany 15 myńǵa jetti. Jyl saıyn 1-synypqa baratyn balalardyń sany artyp keledi», dedi aýyl turǵyny.
О́z kezeginde Qostanaı qalasynan kelgen Aıymgúl Ahmetova densaýlyq saqtaý júıesinde jumys isteıtin, biraq medısınalyq qyzmetkerler qataryna kirmeıtin tárbıeshilerdi pedagogterge teńestirý qajet dep esepteıdi. Bul osy saladaǵy eńbekaqy mólsherin arttyrýǵa múmkindik beredi. Al qazaqstandyq biryńǵaı stomatologtar qaýymdastyǵynyń prezıdenti Nazym Bekturǵanova balalar men júkti áıelderge profılaktıkalyq stomatologııalyq qyzmet kórsetý boıynsha memlekettik baǵdarlama ázirleýdi usyndy.
Kókshetaý qalasynyń turǵyny Farıda Kóshenova «Baqytty otbasy» ıpotekalyq baǵdarlamasyna jetim balalar sanatyn qosýdy surady. Buǵan jaýap retinde Qurylys jáne turǵyn úı-kommýnaldyq sharýashylyq isteri komıtetiniń tóraǵasy Tımýr Qaraǵoıshın mundaı ózgerister Úkimet qaýlysymen bekitilgenin, joba qazir memlekettik organdarda kelisý satysynda ekenin atap ótti.
Pavlodarlyq kásipker Vıktor Prıahın ǵımarattardy paıdalanýǵa berý kezinde jıi tirkeletin keleńsizdikterge toqtaldy. «Kez kelgen nysandy paıdalanýǵa berý kezinde áleýmettik qorǵaý organy júrip-turýy shekteýli adamdar úshin yńǵaıly bolýyn qamtamasyz etý bóligine sáıkes keletini týraly deklarasııany kelisedi. Alaıda bul deklarasııany kelisýdiń naqty algorıtmi men merzimi joq. Osy fýnksııany memlekettik qyzmetter tizilimine qosyp, arnaıy standart ázirleýdi suraımyz», dedi ol. Al almatylyq ekobelsendi Sergeı Snegırev janýarlarǵa jaýapkershilikpen qaraý týraly zań normalarynyń oryndalýyna qoǵamdyq baqylaý júrgizý jobasyn iske qosýdy usyndy.
Partııanyń atqarýshy hatshysy qabyldaý kezinde aıtylǵan ár ótinish boıynsha birqatar naqty tapsyrma berip, suraqtardyń basym bóligin jeke baqylaýyna aldy.
«Halyq únine qulaq asatyn memleket» tujyrymdamasyn iske asyrý aıasynda, partııa bılik pen azamattar arasyndaǵy kópir bolýy tıis. Olar ádildik izdep, bizge keledi. Birde-bir ótinish nazardan tys qalmaıdy», dep atap ótti A.Oralov.
Aıta keteıik, partııanyń qoǵamdyq qabyldaý bólmelerine jyl basynan beri 65 myńnan astam adam júgingen. Turǵyndardy negizinen áleýmettik qamsyzdandyrý (30%), turǵyn úı-kommýnaldyq sharýashylyq (16%), turǵyn úımen qamtamasyz etý jáne jer ýchaskelerin bólý (11%) máseleleri tolǵandyrady. Memlekettik organdardyń basshylary men túrli deńgeıdegi depýtattar 13 myńnan astam qabyldaý ótkizip, 36 myń adamnyń talap-tilegi tyńdaldy. «Mobıldik qoǵamdyq qabyldaýlar» jobasy aıasynda 4 aı ishinde partııalyqtar elimiz boıynsha 578 aýyldy aralap, 5 myńǵa jýyq azamatty qabyldady.
