Medısına • 30 Maýsym, 2022

Medısınalyq poıyz – Jetisý oblysynda

42 ret kórsetildi

«Salamatty Qazaqstan» mamandandyrylǵan medısınalyq poıyzy Jetisý oblysynyń turǵyndaryn Aınabulaq stansasynda qabyldaı bastady. Odan ári poıyz 1-2 shilde aralyǵynda – Kóksý, 3-4 shilde – Eginsý, 5-6 shilde – Beskól, 7-8 shilde – Jaıpaq, 9-10 shilde Dostyq stansalaryna barady. Medısınalyq poıyzdyń tájirıbeli mamandary jergilikti turǵyndarǵa mamandandyrylǵan vagondarda tegin medısınalyq kómek kórsetedi.

Buǵan deıin 20-29 maýsym aralyǵynda medısınalyq poıyz Almaty oblysynyń 6 stansasynyń turǵyndaryna dárigerler tegin konsýltasııalar ótkizip, dıagnos­tıka, emdik pro­sedýralar, sondaı-aq alǵashqy medısı­nalyq kómek kórsetti. Konsýlta­sııalyq-dıag­nostıkalyq poıyzdyń mamandary 853 turǵyndy, onyń ishinde 115 bala, 738 eresekti tekserdi, al dárigerge qaralǵandardyń jalpy sany – 853.

Medısına qyzmetkerleri múmkindiginshe kóp pasıent qabyldaýǵa, olardy tekserýge ári emdeýge jáne qajet bolǵan jaǵdaıda aýdandyq nemese oblystyq aýrýhanalarǵa jiberýge tyrysady. Sonymen eń kóp ótinish JPD, terapevt dárigerine kelip tústi: 636 pasıent, budan ári oftalmolog jáne qulaq dárigerine – 585 pasıent, sondaı-aq hırýrgke – 296 pasıent. Medısınalyq poıyzdyń kabınetterinde barlyǵy 395 EKG, 432 ÝDZ jáne 224 flıýorografııa prosedýralary júrgizildi. Sondaı-aq 111 kishigirim hırýrgııalyq operasııa jasaldy.

Joǵary sanatty oftalmolog dáriger Sáken Kakpenov jobaǵa birneshe jyldan beri qatysyp keledi. «2019 jyly meni «Járdem» medısınalyq poıyzynyń dárigerleri quramynda bir top bolyp jumys isteýge áriptesterim shaqyrdy. Sol kezde biz Qazaqstannyń ońtústik óńirlerin júrip óttik. Men onda kórý qabiletin jaqsartýǵa tıis qanshama adamdy qarap, sonyń nátıjesinde birazyna kómekteskennen umytylmas áser aldym. Bul sapardan biz glaýkoma jáne katarakta sııaqty aýrýlardy erte kezeńderde anyqtap, hırýrgııalyq jolmen emdeý jáne kórý qabiletin jaqsartýdyń mańyzdylyǵyn túsindik. Maǵan medısınalyq poıyzdaǵy jumys tájirıbesi unaıdy. О́ıtkeni bul oftal­mologııadaǵy kóptegen zııandy aýrýdyń aldyn alyp, ony emdeýde úlken paıda ákeledi. Ekinshiden, biz, ıaǵnı dárigerler úshin bul jumyspen úılesetin taza aýadaǵy erekshe demalys», dep medısınalyq poıyzdaǵy jumysynan alǵan áserimen bólisti.

Almaty oblysynyń turǵyndary medısı­nalyq poıyzdyń qyzmetkerlerine tegin kómek kórsetkeni úshin alǵys bildirdi. «Adamdarǵa kómektesetin osyndaı joba úshin kóp rahmet. Men kórshilerimnen medısınalyq poıyzdyń kelgenin jáne densaýlyǵymdy teksertýge múmkindik bar ekenin estidim. Medısınalyq poıyzda óz zerthanasy men júrektiń ÝDZ-sy, ıaǵnı biz úshin eń qajettiniń bári bar eken», dedi Baıserke aýylynyń turǵyny Oralhan Samensalıev.

«Salamatty Qazaqstan» medısınalyq poıyz­y Jetisý oblysynan keıin Shyǵys Qazaq­stan, Abaı, Pavlodar, Aqmola, Soltústik Qazaq­stan, Qostanaı, Qaraǵandy jáne Ulytaý oblys­tarynyń stansalary boıynsha baǵytyn jalǵastyrady.

«Járdem» medısınalyq poıyzy 23 mamyrda jolǵa shyǵyp, aldymen Mańǵystaý oblysyna barǵan bolatyn. Qazirgi ýaqytta poıyz Aqtóbe oblysynda, onda 22 shildege deıin turady. Jalpy, «Salamatty Qazaqstan» medısınalyq poıyzymen birge olar elimizdiń shalǵaı aýdandaryndaǵy 147 stansany qamtıdy.

Sońǵy jańalyqtar

Uqsas jańalyqtar