Ajyrasqandardyń óz mindettemelerin oryndaı almaı, jaýapkershilikten qashyp, alıment tóleýden jaltaryp júrgendigin mamandar jumyssyzdyq, turmystyq jaǵdaıdyń tómendigi, densaýlyǵyna baılanysty jaǵdaılarmen de baılanystyrady. Alaıda mundaı sebepter otbasy aldyndaǵy jaýapkershilikten qashýǵa dálel bola almaıtyny anyq. Bul iste zań organdarynyń ǵana emes, qoǵamdyq ınstıtýttardyń belsendiligi qajet ekeni daýsyz.
Problemalyq alımentterdiń sanyn azaıtý maqsatynda Almaty qalalyq Ádilet departamenti jeke sot oryndaýshylarynyń óńirlik palatasy, polıseıler jáne Jumyspen qamtý ortalyǵymen birlesip boryshkerlerdi ákimshilik jáne qylmystyq jaýapkershilikke tartý, sondaı-aq jumysqa ornalastyrý boıynsha memorandýmǵa sáıkes jumys istep keledi. Nátıjesinde, bıyl 50-den astam boryshker jumysqa ornalasqan.
О́ńirlik kommýnıkasııalar qyzmetinde ótken brıfıngte qalalyq Ádilet departamenti basshysynyń orynbasary Jańabaı Aǵmanov osy jyldyń alǵashqy jarty jyldyǵynda memlekettik sot oryndaýshylarynyń atqarǵan jumystary týraly baıandap, esepti kezeńde jalpy somasy
163 304 689 470 teńgeni quraıtyn 2 myńnan astam qujat qaralǵanyn atap ótti. Sot aktileriniń jalpy sanynyń 1 myńnan astamy nemese 54 paıyzy oń sheshimin tapqan.
Jańabaı Aǵmanovtyń aıtýynsha, sońǵy ýaqytta boryshkerlerdi ákimshilik jáne qylmystyq jaýapkershilikke tartý sharalary tıimdiligin kórsetti. Nátıjesinde, boryshkerler 85 mln teńgeden astam bereshegin ótegen. Birinshi jartyjyldyqta 68 boryshker jaýapkershilikke tartylyp, 18-den astamy ákimshilik qamaýǵa alynsa, 6 boryshker sot aktilerin oryndamaǵany úshin qylmystyq jaýapkershilikke, al 36 boryshker alımenttik óndiriske tartylǵan. Ákimshilik jaýapkershilikke tartylǵannan keıin boryshkerlerdiń óz mindettemelerin oryndaýy 41 paıyzǵa nátıjesin bergen. Al sottalǵandar negizinen kámeletke tolmaǵan balalardy kútip-baǵýǵa alıment tóleý jónindegi mindetterdi uzaq ýaqyt boıy oryndamaı kelgen. Búginde qalalyq Ádilet departamentinde problemalyq alımentter boıynsha 1 776 is tirkeýde tur.
ALMATY
