«Aýyl sharýashylyǵy tehnıkasyn jeńildikpen lızıng baǵdarlamasy bastalǵan kúnnen bastap «QazAgroQarjy» AQ-ǵa otandyq óndiristiń 93 traktory men 52 kombaınyn satyp alý úshin Qazaqstannyń 11 óńirinen aýyl sharýashylyǵy taýar óndirýshilerinen jalpy somasy 9,3 mlrd teńgege 113 ótinim kelip tústi», delingen Aýyl sharýashylyǵy mınıstrliginiń baspasóz qyzmetiniń habarlamasynda.
Baǵdarlamaǵa qatysýǵa ótinimderdi qabyldaý 2022 jylǵy 5 tamyzda bastaldy. Qarjylandyrýdyń jalpy somasy 40 mlrd teńgeni quraıdy, oǵan myńǵa jýyq qazaqstandyq aýyl sharýashylyǵy tehnıkasyn satyp alý josparlanyp otyr.
Baǵdarlamanyń sharttary:
Lızıng merzimi - 10 jylǵa deıin;
Syıaqy mólsherlemesi - jyldyq 6%;
Lızıng boıynsha bastapqy jarna - 0%;
Negizgi qaryzdy qaıtarý boıynsha jeńildikti kezeń - 1 jyl.
Jeńildikti baǵdarlama shaǵyn jáne orta aýyl sharýashylyǵy taýar óndirýshilerine arnalǵan, sondyqtan baǵdarlama boıynsha bir lızıng alýshyǵa - 205 mln teńgeden artyq berilmeıdi jáne tehnıka úsh birlikten aspaýy úshin lımıt belgilengen. Lızıng alýshyny qarjylandyrý eki jyldyq kezeń ishinde bir retten artyq berilmeıdi.
«2022 jylǵy 17 tamyzda jeńildetilgen lızıng baǵdarlamasy boıynsha alǵashqy aýyl sharýashylyǵy tehnıkasyn Qostanaı oblysynda berý josparlanyp otyr», delingen habarlamada.
