Aýyl sharýashylyǵy eńbekkerleri keıingi jyldary egis qurylymyn ártaraptandyrýǵa aıryqsha kóńil bólip keledi. Keıingi úsh jylda maıly daqyldardyń kólemi alty esege kóbeıip, 715 myń gektardan asty. Mal azyǵy daqyldaryna da jetkilikti nazar aýdarylyp otyr. Bul maqsattaǵy daqyldar 166,5 myń gektar alqapqa ornalastyrylsa, kartop pen kókónis alqaptarynyń kólemi de keńeıe túsýde.
«Jaýapty naýqanda uıymshyldyqpen ótkizýge dıqan mehanızatorlardyń kúsh-jigerlerin jumyldyrýmen qatar materıaldyq-tehnıkalyq bazanyń qapysyz daıyndyǵy septigin tıgizdi. Egistik alqaptardyń qunaryn jaqsartý maqsatynda 330 myń tonna mıneraldy tyńaıtqysh paıdalanyldy. Aýyl sharýashylyǵy qurylymdary ósimdikterdi qorǵaý quraldarymen tolyq qamtylǵan», deıdi oblystyq aýyl sharýashylyǵy jáne jer qatynastary basqarmasynyń basshysy Nurbek Badyraqov.
Keıingi jyldary rekordtyq ónim alyp, mańdaı terleriniń óteýin kórip júrgen dıqandar bıyl da úmitti. Kóktem jaýyn-shashyndy boldy. Jerde nár bar. Al bar jumystyń tolaıym atqarylýy memlekettik kómekke de baılanysty. Agrarshylardy qoldaýǵa jeńildetilgen nesıe men sýbsıdııa túrinde 235 mıllıard teńge qarajat baǵyttalyp otyr. «Keń dala – 2» kóktemgi egis jáne egin jınaý jumystaryn jeńildetilgen nesıeleý baǵdarlamasy arqyly 840 aýyl sharýashylyǵy qurylymy taýaryn óndirýshilerge 122 mıllıard teńge qarajat bólindi.
Mashına-traktor parkin jańalaý jumysy odan ári jalǵasyp keledi. Jyl basynan beri dıqandar 789 birlik aýyl sharýashylyǵy tehnıkasyn satyp aldy. Otandyq óndiristegi aýyl sharýashylyǵy tehnıkasyn jeńildetilgen lızıngke berý baǵdarlamasy aıasynda «QazAgroQarjy» aksıonerlik qoǵamy arqyly 610 tehnıka satyp alý týraly kelisimshart jasaldy. Qosymsha qoldaýdy «Azyq-túlik korporasııasy» UK» aksıonerlik qoǵamy arqyly júzege asyratyn forvardtyq satyp alý tetigi kórsetip otyr. Bıyl jalpy kólemi 4,2 mıllıard teńgege 38 aýyl sharýashylyǵy taýaryn óndirýshimen kelisim-shart jasaldy. 3,3 mıllıard teńge kólemindegi 55 ótinim qarjylandyryldy. Bul 59 myń tonna aýyl sharýashylyǵy ónimin jetkizýdi qamtamasyz etýge múmkindik beredi.
Kóktemgi egis aıaqtalǵanymen aqyq dán aıalaǵan dıqandar kelesi naýqandy bastap ketti.
Aqmola oblysy
