«CTS» jańa mobıldi qosymshasy qoǵamdyq kólik jolaýshylaryna, parkıngterdi jalǵa alýshylarǵa jáne velosherıng paıdalanýshylaryna arnalǵan. Qosymshada velobike.kz saıty jáne «Transcard», «CTS Parking» servısteri biriktirildi.
«CTS» jańa mobıldi qosymshasynyń kómegimen paıdalanýshylar «Astrabus», «2GIS» jáne «Iаndeks. Kartalar» balamasy retinde baǵdarlardy naqty ýaqyt rejıminde baqylaı alady. Sondaı-aq qarajatty bank kartasynan ustaı otyryp, QR-kod boıynsha jolaqysyn yńǵaıly tóleý múmkindigi bar. Tek kartany qosymshaǵa baılanystyrsańyz jetkilikti.
«Bizdiń kompanııanyń basty mindeti – elorda turǵyndary men qonaqtary úshin kórsetiletin qyzmetterimizdi barynsha yńǵaıly etý. Osy ýaqytqa deıin bizde kórsetiletin qyzmetterdiń úsh bólek servısi bolatyn: «Transcard» qosymshasy, «CTS Parking» servısi jáne velobike.kz saıty. Bul yńǵaıly emes edi. Al endi yńǵaıly bolý úshin bizdiń qyzmetterimizdiń biryńǵaı terezesi – «CTS» mobıldi qosymshasyn jasadyq. Mysaly, «Transcard» servısterin biriktire otyryp, jańa qosymshanyń paıdalanýshylaryna kólik kartasyn tirkeý jáne tolyqtyrý, teńgerimdi kóshirý, júrgen joldar tarıhyn qaraý qyzmetteri qoljetimdi. Sondaı-aq kassalar men kólik kartasyn toltyrý pýnktteriniń ornalasqan jeri men mekenjaılaryn kórýge de bolady. Budan bólek, jańa qosymshada paıdalanýshylar tirkelip, «Astana bike» veloprokat servısiniń jeke kabınetine kire alady. Sonymen qatar onda abonement satyp alýǵa, teńgerimdi tolyqtyrýǵa, velostansııalardyń ornalasqan jerin, velosıpedter men bos qulyptardyń qoljetimdi sanyn kórýge bolady», dedi «City Transportation Systems» JShS Basqarma tóraǵasy Ǵanı Tájıev.
Sonymen qatar «CTS» jańa mobıldi qosymshasynda Sity Transportation Systems kompanııasynyń parkıngterin jalǵa alýshylar úshin turaq oryndarynyń ornalasqan jeri men qoljetimdi turaqtar sanyn kóre otyryp, onlaın-jaldaý qyzmetteri de bar.
