Konstantın Harlamov jaqynda telearnanyń birinshi maýsymy bastalǵanyn eske saldy.
«Biz óte qundy muramen jumys istep jatyrmyz. Biz ómir súrip jatqan tarıhı kezeń bizdiń aldymyzǵa birshama ózgeshe mindetter qoıyp otyr. О́ıtkeni Jańa Qazaqstan - memlekettiń jańa ımıdji», dedi Konstantın Harlamov Astana Media Week alańynda.
Telearna dırektory Jibek Joly komandasynyń aldyna qoıǵan úsh negizgi mindetti atady.
«Birinshi mindet - daýysty kúsheıtý. Bul aqparattardyń aýqymyn keńeıtýdi bildiredi. Álemde oryn alyp jatqan oqıǵalar munyń qajettiligin anyq kórsetti. Memleket basshysy Qasym-Jomart Toqaev elimizde jáne búkil álemde beıbitshilikti nyǵaıtýǵa kúsh salýda. Gıbrıdti soǵystar dáýirinde dáıekti habar taratý óte mańyzdy. Sonymen qatar bizdiń elimizdiń ustanymy álemdik qoǵamdastyqqa kóbirek qyzyǵýshylyq tanytýda. Biz ózgeris jolymen neǵurlym belsendi júrsek, sondaı-aq aınalamyzdaǵy álem qanshalyqty kúrdeli bolsa, suranys soǵurlym kúshti bolady. Biz tek Qazaqstannyń ǵana emes, Ortalyq Azııanyń da daýysyna aınala otyryp habar taratýǵa daıynbyz. Bul rette biz basqa da buqaralyq aqparat quraldarymen yntymaqtastyq perspektıvalaryn qarastyrýdy jón sanaımyz», dedi spıker.
Konstantın Harlamovtyń aıtýynsha, ekinshi mindet - «áńgimeler sıqyry».
«Ejelgi dáýirden bastap tarıh bilim men aqparatty urpaqtan urpaqqa jetkizýdiń negizgi quraly boldy. Buryn adamdar eń jarqyn oqıǵalar aǵynyn bilý úshin jarqyldaǵan ottyń aınalasyna jınalyp áńgimelesetin. Búgingi tańda bizdiń telefondarymyzdyń, basqa gadjetterdiń, kompıýterlerdiń, teledıdarlardyń ekrandarynyń jypylyqtaıtyn jaryǵy - kóptegen tyńdaýshylardy jınap jatyr. Biraq biz óz tarıhymyzdy jáne keıipkerlerimizdi bilemiz be? Máselen, Názıra - Eýropada úlken suranysqa ıe qazaqstandyq dı-djeı, ol týraly The New York Times gazeti de biregeı mýzykalyq qozǵalys medıasyn jasaýshy retinde maqala shyǵarǵan. Matematık Tımýr Ryspekov she? Ol óz komandasymen birlesip úlken derekterdi óńdeýge qabiletti biregeı algorıtm jasaǵan. Onyń algorıtmi jer silkinisi men banktik alaıaqtyqty boljaý maqsatynda qoldanylyp keledi. Mundaı keıipkerler óte kóp. Biraq biz olar týraly sheteldik BAQ-tan estımiz», dedi ol.
Spıker bólisken úshinshi mindet - áleýmettik optımızm. Bul rette Konstantın Harlamov jańa telearna Qazaqstannyń eń mańyzdy bastamalaryn zerttep, baıandaýǵa nıetti ekenin jetkizdi.
Eske sala ketsek, 1 qyrkúıekten bastap elimizde QazaqTV arnasy Jibek Joly ataýyn alyp habar tarata bastady. Arna kórermenderge qoǵamdyq-saıası oqıǵalar, qoǵamdy tolǵandyratyn máseleler, mádenı jáne sporttyq jańalyqtardy usynady.
