Neandertaldyq adamdar izi buǵan deıin Eýrazııa qurlyǵynyń kóptegen úńgirinen tabylǵan. Bul jan ıesi budan 430 myń jyl buryn paıda bolyp, shamamen 40 myń jyl buryn joıylyp ketken.
Joǵarydaǵy eki úńgirdi zertteý barysynda 54 myń jyl buryn ómir súrgen 20 shaqty adamnyń izi tabylǵan kórinedi. Naqtyraq aıtqanda, eki úńgirdiń biri Shaǵyrdan 11 jannyń izi anyqtalsa, sol mańǵa jaqyn ornalasqan Okladnıkov úńgirinen eki neandertaldyqtyń deregi shyǵypty.
Shaǵyr úńgirinde ómir súrgen neandertaldyqtardyń DNQ-syn anyqtaǵan shved ǵalymy Svante Paabo osy eńbegi úshin jýyqta Nobel syılyǵynyń laýreaty atandy. Bul oqymystynyń paıymyna qarasaq, neandertaldyqtardyń geni áli kúnge deıin tiri deıdi. Bul tek-tuqym ókilderiniń shamamen 2 paıyz geni jer betinde áli kúnge deıin ómir súrip jatyr.
Taǵy bir jańalyq, genetık ǵalymdar úńgirden tabylǵan saýsaq súıeginen alynǵan genetıkalyq aqparatty tasymaldaýshy molekýlalardy zertteý barysynda buryn belgisiz bolyp kelgen taǵy bir adam poshymdy jan ıesin anyqtady.
Bul retki jańalyqtyń ashylýyna Germanııadaǵy Maks Plank ǵylymı ortalyǵy Antropologııa bóliminiń zertteýshisi Laýrıs Skovtyń eńbegi zor. Bul maman eki úńgirden tabylǵan 17 súıek tisine uzaq jyl zertteý júrgizip, anyqtalǵan derekter arqyly bul jerde jeti er, alty áıel adamnyń ómir súrgenin dáleldep shyqqan. Tipti bulardyń beseýi jasóspirim degen qorytyndy shyǵarǵan.
Onyń syrtynda bul kisilerdiń barlyǵy bir-birine týys ekeni genetıkalyq zertteý nátıjesinde belgili bolǵan. Al myna jańǵyrtylǵan syzba-sýret Shaǵyr úńgirinde ómir súrgen áke men qyzynyń beınesi.
