Álıhan Smaıylov otyrystyń pandemııadan keıingi kezeńde alǵash ret júzbe-júz ótkenin jáne Qazaqstannyń TMD-ǵa tóraǵalyq etýiniń qorytyndy is-sharasy bolǵanyn atap ótti.
«Búgin yntymaqtastyqty odan ári damytý máseleleri boıynsha keleli áńgime órbidi. Memleketter Dostastyq sheńberindegi kópjaqty ózara is-qımyldy nyǵaıtýǵa nıetti ekenderin taǵy da rastady. Sondaı-aq syrtqy ekonomıkalyq yntymaqtastyq aıasynda ortaq maqsattarǵa qol jetkizý boıynsha birlesken qadamdar talqylandy», dedi Álıhan Smaıylov.
Onyń aıtýynsha, TMD keńistiginde saýda-ekonomıkalyq baılanystardy tereńdetý maqsatynda Qyzmetterdiń erkin saýdasy jáne ınvestısııalardy júzege asyrý týraly kelisimniń jobasyn aıaqtaý jóninde sheshim qabyldandy.
Budan basqa, Qoǵamdyq densaýlyq saqtaý salasynda sanıtarlyq-epıdemıologııalyq sıpattaǵy tótenshe jaǵdaılardyń aldyn alý jáne den qoıý jónindegi yntymaqtastyq týraly kelisimge qol qoıyldy, mıkrobqa qarsy preparattarǵa tózimdilikti tejeý jónindegi birlesken is-qımyl jospary qabyldandy, sondaı-aq gýmanıtarlyq yntymaqtastyq salasyndaǵy 2023-2024 jyldarǵa arnalǵan basym is-sharalar jospary maquldandy.
«Ǵylymı-tehnıkalyq, ınnovasııalyq, tehnologııalyq salalarmen qatar hımııa salasyn sıfrlyq transformasııalaý jáne radıonavıgasııa salasyndaǵy yntymaqtastyq boıynsha birneshe másele boldy. Úkimet basshylary osy salalarda ózara is-qımyldy damytý boıynsha birqatar tujyrymdamalyq jáne baǵdarlamalyq qujatty qabyldady», dep atap ótti Álıhan Smaıylov.
Sondaı-aq ol Keńestiń 2023 jyly Dostastyq organdary men jekelegen is-sharalardy qarjylandyrýǵa qatysty qarjylyq-bıýdjettik máselelerdi qarap, sheshimder qabyldaǵanyn aıtty.
«Qazaqstandyq tarap búgingi is-sharanyń qorytyndylaryna qanaǵattandy. Ol memleketterimiz ben halyqtarymyzdyń ıgiligi úshin yntymaqtastyqty nyǵaıtý jolyndaǵy kezekti qadam bolatynyna senimdimiz», dep túıindedi Premer-Mınıstr.
TMD úkimet basshylary keńesiniń kezekti otyrysyn 2023 jyly maýsymda Sochı qalasynda ótkizý týraly sheshim qabyldandy.
