Kandıdat barǵan alǵashqy nysan «Semeı ınjınerıng» zaýyty boldy. Kásiporyn jumysshylarymen kezdesý barysynda kandıdat ekonomıkalyq reformalardyń bir bóligi retinde eń tómengi jalaqyny qalyptastyrý taqyrybyna toqtaldy.
«Búgingi tańda eń tómengi jalaqynyń (ETJ) qalaı anyqtalatyny belgisiz. Men ony ındeksteýdi ashyq etip qana qoımaı, EYDU (Ekonomıkalyq yntymaqtastyq jáne damý uıymy) damyǵan elderiniń deńgeıine jetkizýdi usynamyn. Tıisinshe ETJ 60 myń teńgeni emes, kem degende 150 myń teńgeni quraıtyn bolady», dep naqtylady M.Qajyken.
Kandıdat azamattyq qoǵam taqyrybyna toqtala otyryp, bul saılaýaldy baǵdarlamasynyń negizgi bólimi ekenin atap ótti: «Memleket árbir azamatqa ózin-ózi damytý úshin qolaıly jaǵdaılar men múmkindikter jasaýy kerek. Azamattyń ózi áleýmettik seriktestik, atap aıtqanda kásipodaqtar, kásipkerler qaýymdastyǵy, azamattyq qoǵam ınstıtýttary arqyly ómir súrý jaǵdaılaryn ózgerte alatyn úderisterge qatysýy kerek. Bul – bizdiń alǵa qoıǵan maqsatymyz».
Sondaı-aq úmitker: «Bizdiń armııamyzdyń qarý-jaraǵyn jańǵyrtý, memlekettik qorǵanys tapsyrysy, kadrlar daıarlaý júıesin jetildirý sekildi máselerdi sheshý óte mańyzdy. Sonymen qatar qorǵanys ónerkásibin qurý baǵdarlamasy jan-jaqty qoldaýǵa ıe bolýǵa tıis», dedi.
