«Eger árbir azamat sapaly taýarlar men qyzmetterdi tutyný kezinde óz quqyǵyn qorǵaıtyn bolsa, nátıjesinde tikeleı nemese janama túrde bıznesmender arasynda salamatty básekelestikti arttyrýǵa yqpal etedi. Iriktelip, tek úzdikteri qalady», dedi Saltanat Tursynbekova.
Qazaqstandyqtardyń 35 paıyzy tutynýshy quqyǵy buzylsa eshqaıda júginbeıdi eken. Mundaı nátıjelerdi tabıǵı monopolııalardy retteý, básekelestikti qorǵaý jáne tutynýshylardyń quqyqtaryn qorǵaý komıtetiniń 2017 jylǵy áleýmettik saýalnamasy kórsetti. 2021 jyly tabıǵı monopolııalardy retteý komıteti júrgizgen taǵy bir áleýmettik zertteý Qazaqstanda tutynýshylardyń quqyqtary negizinen bólshek saýda, qoǵamdyq tamaqtandyrý, qoǵamdyq kólik, HQKO jáne bazarlardaǵy saýda salalarynda buzylatynyn kórsetti.
«Saýda ortalyqtaryna, dúkenderge, bazarlarǵa, tamaqtaný oryndaryna baramyz. Osy máselelerde tutynýshy retinde quqyqtarymyz qanshalyqty qorǵalǵan? Taýar búlinse, qyzmet tolyq kólemde, óz ýaqytynda kórsetilmese she? Qazaqstanda osy boıynsha arnaıy tutynýshylardyń quqyǵyn qorǵaıtyn zań qabyldanǵan, biraq ony qarapaıym azamattar bile bermeıdi», dedi kandıdat.
