Áýeli vedomstvo basshysy Kóksý qant zaýytyna baryp, kásiporynnyń jumys barysymen tanysty. Zaýyt búginde 100 adamdy turaqty, 450-ge jýyq adamdy maýsymdyq jumyspen qamtamasyz etip otyr. Byltyr qant quraǵyn óńdeýge 200 mln teńge ınvestısııa tartylǵan edi. Kásiporynnyń jyldyq qýaty – 250 myń tonna, táýligine 2 myń tonna qant qyzylshasy óńdeledi. Issapar barysynda mınıstr: «Elimizde 4 qant zaýyty bar. Onyń ekeýi – Jetisý óńirinde. Biz qant qyzylshasyn óndirýge basa nazar aýdaryp otyrmyz», dedi.
Odan keıin Eskeldi aýdanyndaǵy «Hılnıchenko ı K» óndiris ornyna baryp, kásiporynnyń tynys-tirshiligimen tanysty. Aýyl sharýashylyǵy ónimderin óndirý jáne qaıta óńdeý sehy 2016 jyldan beri jumys istep keledi. Qoımanyń syıymdylyǵy – 5 myń tonna.
Kelesi kezekte Serik Jumanǵarın Til saraıynda óńir jurtshylyǵymen kezdesti. Is-shara barysynda vıse-premer azamattardy áleýmettik qoldaý, azyq-túlik baǵasyn turaqtandyrý maqsatynda qabyldanyp jatqan sharalar týraly baıandady.
«Jetisý oblysy áleýmettik turǵydan belsendi damyp keledi. Qazir Kerbulaq aýdanynyń Saryózek aýylynda emhana salynýda. 2025 jylǵa deıin Alakól aýdandyq emhanasy turǵyzylady. Taldyqorǵanda oblystyq balalar aýrýhanasy jáne onkologııalyq dıspanser, Aqsý jáne Kerbulaq aýdandaryna taǵy aýrýhana salý kózdelip otyr. Sonymen qatar Panfılov aýdanynda aýdanaralyq aýrýhanany jańǵyrtý josparlanýda. Budan basqa 15 dárigerlik ambýlatorııa, 39 feldsherlik-akýsherlik jáne 5 medısınalyq pýnkt iske qosylady», dedi vıse-premer.
Sonymen qatar mádenıet salasynda 2025 jylǵa ólketaný murajaıy, kitaphana, 7 aýyldyq Mádenıet úıi boı kótermek. О́ńirdiń sporttyq damýy úshin 6 sporttyq jáne 6 dene shynyqtyrý-saýyqtyrý keshenin salý da josparlanýda. Basqosýda vedomstvo basshysy ataýly áleýmettik kómek boıynsha atqarylyp jatqan sharýalarǵa da toqtaldy.
«О́ńirde ataýly áleýmettik kómekti shamamen 7 400 otbasy alady. Keıbir azamattar memleketten qoldaý alý úshin qandaı qujattardy jáne olardy qaıda tapsyrý kerektigin bilmeı jatady. Áleýmettik salada, sondaı-aq densaýlyq saqtaý, bilim berý salalarynda memlekettik qoldaý sharalaryn taǵaıyndaýdyń proaktıvti formatyna kóshý úshin «Otbasynyń sıfrlyq kartasy» aqparattyq júıesi ázirlenýde. Júıe azamattar týraly barlyq málimetti ártúrli memlekettik organnan biryńǵaı bazaǵa biriktiredi. Osy arqyly azamattardyń áleýmettik deńgeıin aıqyndaýǵa jáne olarǵa proaktıvti formatta kepildi memlekettik qoldaý kórsetýge múmkindik týady», dedi Premer-Mınıstrdiń orynbasary.
Jıyn barysynda áleýmettik mańyzy bar azyq-túlik taýarlarynyń baǵasyn retteý boıynsha atqarylyp jatqan jumystar da keńinen talqylandy. Sala basshysy bıyl 12 qazanda Saýda komıteti, áleýmettik-kásipkerlik korporasııalar men qant zaýyttary arasynda el aýmaǵynda qant baǵasyn retteý týraly memorandýmǵa qol qoıylǵanyn jetkizdi. Aımaqtar boıynsha qantqa degen qajettilik jáne qarjylandyrý múmkindikteri eseptelgen. Búginde 13 óńirde qaryz sharttary qol qoıý satysynda. Kóksý qant zaýytymen jalpy somasy 5,6 mlrd teńgege nesıelik kelisim aıaqtalýǵa jaqyn.
Issapar sońyndaǵy qabyldaýda qala turǵyndary men kásipkerler jer, sý, aýyl sharýashylyǵy, turǵyn úı máselesi syndy kókeıde júrgen suraqtaryn qoıyp, tushymdy jaýap aldy.
Jetisý oblysy
