Pikir • 30 Qarasha, 2022

El erteńi – bilikti maman

Memleket basshysy Qasym-Jomart Toqaevtyń saltanatty ulyqtaý rásiminde sóılegen sózin Astana tórindegi Táýelsizdik saraıynda otyryp tyńdadym. Tarıhı sátten túıgenderim kóp. Sonyń ishinde, el Prezıdentiniń kadrlyq saıasat tóńireginde aıtqandary kóńilge qondy.

Egemen Qazaqstan

Kadr máselesi – óte kúrdeli ári asa mańyzdy. Eski kadrlarmen jańa Qazaqstan qurý múmkin emes ekenin el bilip otyr. Árıne, eldiń basqarý júıesine bir mezette «saıası tazalaý» jasaý múmkin emes. Deıturǵanmen, bul salada seń ornynan qozǵaldy.

Halyq senimsizdik tanytyp otyrǵan memlekettik júıe dál sol eski kadrlar tusynda qalyptasty. Al eski saıasatkerler eski júıeni tańdaıdy. Sebebi bul ózderiniń saıası ómirlerin uzartýǵa múmkindik beredi. Onsyz da, eldegi jańa bastamalardy ómirsheń etýge tıis komanda áli de ótken kúnniń sarqynshaǵy. Bul – bir.

Ekinshiden, kadrlyq saıasatta komandalyq aýys-túıis, tamyr-tanystyq, tipti rýshyldyq «janashyrlyqtar» áli de bar. Saıası sahnalarda beleń alyp jatatyn bul jaısyzdyqtardy da túp-tamyrymen joıatyn ýaqyt jetti. Sebebi júregi «qazaq» dep soǵatyn, isker, bilikti, bilimdi talaı jas azamattar sanatqa ilikpeı keledi.

Mundaıdan arylý úshin merıtokratııa uǵymy engizilgenin bilemiz. Muny ulyqtaý rásiminde sóılegen sózinde el Prezıdenti de atap ótti. Bul bastama tamyr-tanystyqty joıyp, qyzmettegi satyly ósý qaǵıdaty jaqsy kadrlar men tájirıbesi mol mamandardyń el basqarý isine aralasýyna múmkindik berýge tıis.

Qasym-Jomart Kemeluly barlyq memlekettik qyzmetshiden óz jumysyn adal atqarýdy talap etetinin basa aıtty. Basty qaǵıdaty kásibılik, adaldyq jáne qarapaıymdylyq bolatyn memlekettik basqarýshylarǵa, ásirese, jas mamandarǵa basymdyq berilmek. Bastama basqarý júıesiniń barlyq satysynda, óńirlerde tabysty júzege assa degen tilegimiz bar.

Danııar JUMADIL,

«Jebe» qoǵamdyq birlestiginiń tóraǵasy

Pavlodar oblysy