Saıasat • 02 Jeltoqsan, 2022

Muhtar Tileýberdi birqatar eldiń basshysymen ekijaqty kezdesý ótkizdi

EQYU Syrtqy ister mınıstrleri keńesiniń 29-shy otyrysy sheńberinde Qazaqstan Respýblıkasy Premer-Mınıstriniń orynbasary – Syrtqy ister mınıstri Muhtar Tileýberdi S5+1 formatyndaǵy «Ortalyq Azııa jáne Germanııa Federatıvtik Respýblıkasy» mınıstrlik kezdesýine qatysty, dep habarlaıdy Egemen.kz mınıstrliktiń baspasóz qyzmetine silteme jasap.

Aıana TOǴANBEK

Kezdesýdiń kún tártibine Ortalyq Azııadaǵy óńirlik yntymaqtastyq, Aýǵanstandaǵy qaýipsizdik, klımattyń ózgerýiniń aımaq ekonomıkasyna áseri jáne t.b. máseleleri kirdi. Ortalyq Azııa men Eýropa elderiniń ózara baılanysyna, atap aıtqanda, óńiraralyq saýda men kólik ınfraqurylymyn damytýdaǵy, onyń ishinde Eýropalyq Odaqtyń «Global Gateway» baǵdarlamasynyń kómegimen yntymaqtastyqqa erekshe nazar aýdaryldy.

QR syrtqy saıası vedomstvosynyń basshysy óz sózinde tranzıt-kóliktik saladaǵy yntymaqtastyq máselesi álemdegi buryn-sońdy bolmaǵan sońǵy geosaıası ózgerister men jetkizý tizbeginiń buzylýy aıasynda erekshe ózekti bolyp otyrǵanyn atap ótti.

«Qazaqstan Ortalyq Azııa men Eýropa arasynda, onyń ishinde Germanııamen ózara úlken baılanys ornatýǵa múddeli. Biz qatysýshylardy Ortalyq Azııanyń Memleketaralyq sý-energetıkalyq konsorsıýmyn qurý bastamasyna qosylýǵa shaqyramyz», dedi M.Tileýberdi.

Taraptar balamaly marshrýttardy, atap aıtqanda Transkaspıı halyqaralyq kólik baǵytyn damytýǵa ózara múddeliliktiń joǵary deńgeıin rastady.

Sonymen qatar, SIMK aıasynda M.Tileýberdi Aýstrııa, Kanada, Kıpr, Norvegııa, Portýgalııa, Slovenııa, Ulybrıtanııa, Shvesııa, Estonııa, Demokratııalyq ınstıtýttar jáne adam quqyqtary jónindegi bıýro (DIAQB) jáne EQYU Parlamenttik Assambleıasy delegasııalarynyń basshylarymen birqatar ekijaqty kezdesý ótkizdi.

Ekijaqty kelissózder barysynda atalǵan eldermen jáne uıymdarmen saıası, saýda-ekonomıkalyq jáne mádenı-gýmanıtarlyq yntymaqtastyqty odan ári keńeıtýdi qosa alǵanda, ekijaqty kún tártibiniń basym máseleleri talqylandy.