Buǵan deıin qalamgerdiń «Uly dala arýlary» serııasymen shyqqan «Súıinbıke», «Bozoq arýy», «Urpaǵyna uran bolǵan analar» atty kitaptary oqyrmandaryna jol tartqanyn bilemiz. Atalǵan eńbekterdiń jalǵasyndaı kezekti kitabynyń tusaýkeser rásimi men tanystyrylymy L.N.Gýmılev atyndaǵy Eýrazııa ulttyq ýnıversıtetiniń kitaphanasynda ótti. Kópshilikke tanystyrylǵan «Aıymdar joqshysy» kitabynyń avtory Shárbaný Qonaqbaıqyzy – qazaq halqynyń ǵana emes, tutas túrki álemi tarıhynda aıryqsha orny bar uly analarymyz ben qaıratker hanymdar tulǵasyn tasqa qashap kele jatqan qalamger. Uly dala tósinde ulaǵatty tý etken áıel-analar esimderin tarıhqa altyn árippen jazýshy bıyl mereıli 75 jasqa tolyp otyrǵany jáne bar.
Avtordyń qos birdeı qýanyshyn alqalap kelgen Memlekettik syılyqtyń laýreaty, aqyn Nesipbek Aıtuly, belgili aıtysker aqyn Egeýhan Muqamádıqyzy, Memlekettik syılyqtyń laýreaty, jazýshy-dramatýrg Roza Muqanova, belgili jazýshy Asqar Altaı jáne taǵy basqa zııaly qaýym ókilderi men ýnıversıtettiń basshylyq quramy, ǵalymdar qatysqan is-sharany belgili jazýshy Álibek Asqarov júrgizip otyrdy. Esimderi atalǵan aqyn-jazýshylar sóz sóılep, júrekjardy lebizderimen bólisip, avtorǵa yqylas tanytty. Keshti uıymdastyrýshy ýnıversıtettiń fılologııa fakýltetinde oqıtyn bir top stýdent Shárbaný Beısenova shyǵarmashylyǵynan úzindiler oqydy.
Kóshim hanǵa jar bolǵan Súzgeniń, Sapagereıdi jebegen Súıinbıkeniń ómiri men ónegesin sýrettegen Shárbaný Qonaqbaıqyzynyń bir keıipkeri, akademık Muhamedjan Qarataevtyń jary Marhýma apaı: «Kıim syrtynan emes, ishinen tozady», depti. «Áıel – kıimniń ishi. Ol syrtynan da myqty bolýy kerek, tozbaýǵa tıis». Búgingi urpaq bilip ósýge tıis bir sóz osy dep bilemiz.
