«Bir jyl buryn elimizde qaıǵyly qańtar oqıǵalary oryn aldy. Sol kúnderi beıbit narazylyq aksııalary jappaı tártipsizdikterge ulasty, memlekettik tóńkeris jasaýǵa tyrysqan reaksııalyq kúshter buny utymdy paıdalandy. Olardyń basty maqsaty - elde júrgizilip jatqan jańashyldyqtarǵa tosqaýyl bolyp, eskirgen saıasatty saqtap qalý», dep jazdy Erlan Qarın óziniń Telegram arnasynda.
Erlan Qarınniń aıtýynsha, elimiz haos pen anarhııaǵa túsý qaýpine tap boldy. Bul jerdegi basty másele - bizdiń memlekettiligimizdi saqtaý.
«Memlekettik tóńkeris uıymdastyrǵan qylmyskerlerdiń áreketi azamattardyń birligi men Prezıdenttiń sheshýshi áreketteriniń arqasynda ǵana sátsiz aıaqtaldy. Nátıjesinde, biz jaǵdaıdy turaqtandyra aldyq. Mundaı daǵdarystardan ótken memleketterdiń bıligi eldegi saıası jaǵdaıdy jabyq ustaýǵa tyrysady. Al bizdiń elde lıberalızasııa men demokratııa baǵytyndaǵy qozǵalys toqtamaı, kerisinshe jedeldedi. Prezıdenttiń bastamasymen elimizde jańǵyrtýdyń serpindi jáne jan-jaqty prosesi bastaldy», dep qosty Memlekettik keńesshi.
Bul rette Erlan Qarın Memleket basshysynyń strategııalyq baǵyty konstıtýsııalyq referendým men kezekten tys prezıdent saılaýynyń nátıjelerimen dáleldengen keń qoǵamdyq qoldaýǵa ıe bolǵanyn atap ótti.
«Qazir bizdiń aldymyzda qoǵamnyń birligin saqtaı otyryp, josparlanǵan reformalardy tolyq iske asyrý mindeti tur», dep qorytyndylady Erlan Qarın.
