Sýretti túsirgen Jumabaı Musabekov
Atalǵan saltanatty jıynnyń tizginin oblystyq «Jetisy» gazeti bas redaktorynyń orynbasary, aqyn Jumataı Ámire ustady.
«Qazaq ádebıeti men mádenıetinde orny bólek keshegi Maǵjan, Ilııas, Muhtar bastaǵan uly kóshtiń bári de gazet arqyly tanylyp, esimi tarıhta qaldy. Odan keıingi san býyndy tárbıeleýde de basylymdardyń orny erekshe, bedeli bıik boldy. Mine, búginde sol dástúrdi Andas áýleti jalǵastyryp, oblystyń aýdan, qalasynan 8-10-synyp aralyǵynda oqıtyn 30 oqýshyny «Oqýǵa qushtar mektep» jobasy aıasynda gazetke jazdyryp, demeýshilik tanytyp otyr. Árıne, bilimge, ǵylymǵa, rýhanııatqa jasalǵan demeýshiliktiń baǵasy ústem bolatyny anyq», dedi J.Ámire.
«Oqýǵa qushtar mektep» jobasy Prezıdent Qasym-Jomart Toqaevtyń Ulytaýda ótken Ulttyq keńeste bergen tapsyrmasy aıasynda júzege asýda. Oblystyq bilim basqarmasynyń bas mamany Rýslan Arsylanov atalǵan joba aıasynda óńirimizde qandaı sharalardyń atqarylyp, nendeı jetistikterge jetkeni týraly baıandasa, «Kazposhta» AQ Almaty oblystyq fılıalynyń jetekshisi Aıbol Tańjarbek oqýshylarǵa poshtaǵa jazylǵan túbirtegin tabys etti.
Kelesi kezekte Andas áýletiniń otanasy, «Parasat» ordeniniń ıegeri, «Altyn alqaly» ana Áýeshan Majaıqyzy balalardyń bolashaǵyna sáttilik tilese, osy áýlettiń uly, áriptesimiz Qajet Andas áýlet qundylyǵy týraly aıta kelip, tarıhshy, aıtys jáne jazba aqyn Andas Omaraqynnyń «Tarıh talǵarynda», «Doda», «Jyldar izi» atty 3 tomdyq eńbegin tanystyryp, oqýshylarǵa syıǵa berdi. Sondaı-aq oblystyq bilim basqarmasy men Andas áýleti birlese otyryp, aldaǵy jarty jylda «Oqýǵa qushtar mektep» jobasy negizinde júrgiziletin «Andas Omaraqyn oqýlarynyń» erejesimen tanystyrdy.
«Jańa bastama búgingi sharaǵa qatysqan 30 oqýshynyń arasynda, alǵashqy jarty jyldyqta synaq retinde ótedi. Ol «Tarıh talǵarynda» jas ólketa nýshylardyń ǵylymı jumystary baıqaýy, «Doda» atty jas aqyndar aıtysy jáne «Jyldar izi» atty jas shaıyrlar músháırasy sııaqty úsh baǵytta júrgiziledi. Ár atalymǵa daıyndalǵan oqýshylar eńbeginde Andas Omaraqyn shyǵarmashylyǵyn úlgi etýi kerek. I, II, III dárejeli oryn alǵan úmitkerge oblystyq bilim basqarmasynyń Alǵyshaty men Andas otbasy atynan qomaqty aqshalaı júlde taǵaıyndalady. Úsh atalym boıynsha I oryn alǵan oqýshylar oqıtyn mektepke oblystyq bilim basqarmasynyń «Oqýǵa qushtar mektep» atty kóshpeli týy tapsyrylady», dedi Q.Andas.
Kelesi kezekte ár óńirden kelgen oqýshylar óz ónerlerin kórsetip, óleń oqyp, aıtysyp, sharanyń shyraıy ashyla tústi.
Jetisý oblysy
