Sýretti túsirgen Jumabaı Musabekov
Jalpy, Aqshatoǵan jáne Eńbekshiqazaq aýyldarynda júrgizilgen qurylysqa respýblıkalyq qazynadan 240 mln teńge bólingen. Qos mekeme 2 myńǵa jýyq turǵynǵa qyzmet kórsetedi. Jańa bir qabatty FAP ǵımaratynda 12 kabınet jabdyqtalǵan. Onda alǵashqy medısınalyq kómek kórsetý úshin barlyq jaǵdaı jasalǵan.
«Aqshatoǵan aýylynda emdeý jumystary yńǵaılastyrylǵan ǵımaratta júrgizilip keldi. Ol óte eski. Tozyǵy jetken ǵımarat zamanaýı sanıtarlyq talaptarǵa saı kelmedi. FAP qurylysy kóp jyldan beri qordalanyp kelgen máseleni sheshti. Endi jergilikti turǵyndar sapaly medısınalyq qyzmet ala alady», deıdi Kóksý aýdanynyń ortalyq aýrýhanasynyń dırektory Jannur Syrymov.
Feldsherlik-akýsherlik pýnktte quraldardy zararsyzdandyrýǵa, analızderdi jınaýǵa jáne pasıentterdi vaksınalaýǵa arnalǵan barlyq qajetti jabdyq bar.
Aıta keteıik, bıyl Kóksý aýdanynda taǵy 3 FAP jáne 4 BMK qurylysy júrgiziletin bolady.
Al shaǵyn ǵana Shaǵan aýylynda úlken toı. Buǵan deıin bastaýysh mekteptiń bir bólmesin panalaǵan medpýnkt endi óz aldyna bólek otaý tigip otyr. Blokty-modýldi konstrýksııadan jyldam turǵyzylǵan ǵımarat medısınalyq kómek qyzmetine laıyqtalyp salynǵan. Munda em-dom jasaıtyn jáne sharýashylyq qajettilikterge arnalǵan alty bólme bar. Medpýnktte úsh adam eńbek etedi.
Aýyl feldsheri Ulbosyn Qýanyshbaeva jańa nysanǵa ornyqqandaryna dán rıza:
«О́zi shaǵyn mekteptiń bir bólmesinde tyǵylysyp otyrdyq, árıne, qolaısyz boldy. Sonda da aýyldaǵy 100-ge jýyq turǵynǵa kórsetiletin medısınalyq kómekti úzgen joqpyz. Endi jańa ǵımaratqa kóshtik, munda barlyq jaǵdaı jasalǵan. Bul medısınalyq qyzmet kórsetý sapasyna da óziniń oń yqpalyn tıgizetin bolady», dedi feldsher.
Ǵımarattyń ashylý saltanatyna aýdan ákimi Qanat Esbolatov arnaıy baryp, aýyl turǵyndarymen sóılesti. Nysannyń lentasyn qıyp, batasyn bergen aýyldyq aqsaqaldar keńesiniń tóraǵasy Rysjan Baıdáýletov:
«Shaǵan aýyly úshin bul erekshe qýanysh. Bas aýyryp, baltyr syzdasa, júginetimiz osy medpýnkt. Onyń óz aldyna bólek ǵımaratqa kóship, jańa jerge ornyǵyp jatqanyna rızamyz. Barlyq quraldaryn túgendep, otyratyn oryndaryn jaılastyryp, bar jaǵdaıdy jasap qoıypsyzdar. Aýyl turǵyndarynyń atynan raqmet aıtamyn», dedi.
Jetisý oblysy ákiminiń baspasóz qyzmetiniń málimetinshe, medısınalyq pýnkttiń qurylysyn «Qaz Damu Construction» JShS ótken jyldyń tamyz aıynyń sońynda bastaǵan. Mine, 3-4 aı kóleminde qurylys jumystaryn tolyq aıaqtap, ǵımarat iske qosyldy. Jobanyń quny – 35 mln 840 myń teńgeni quraıdy.
Jetisý oblysy
