Bul - álemniń 100-den astam elinde kórsetilgen áıgili «The Voice. Kids» teleshoýynyń qazaqstandyq nusqasy.
«Qazaqstan» telearnasynyń efırinde alty aıǵa jalǵasqan mýzykalyq megajobanyń alǵashqy kezeńinde 4 myńnan astam bala baq synady.
Baıqaýǵa 8-14 jas aralyǵyndaǵy balalar qatysa alady.
Jobaǵa qatysý úshin qazaqstan.tv saıtyna kirip, ótinish qaldyrý qajet. О́tinimder 2023 jylǵy 10 aqpanǵa deıin qabyldanady.
Mýzykalyq baıqaý jalpy tórt kezeńnen turady. «Kórmeı tańdaý» kezeńinde tálimgerler irikteýden ótken qatysýshylardy kórmeı, daýysyna baǵa berý arqyly tańdaıdy.
Al ekinshi «Jekpe-jek» kezeńinde ár tálimger óz komandasyn trıoǵa (úshtikke) bóledi. Bul kezeńde qatysýshylar trıo retinde bir ándi oryndaıdy. Oryndaý nátıjesi boıynsha tálimger úsh qatysýshynyń ishinen shoýdan kimniń shyǵatynyn sheshedi.
Kelesi «Tikeleı efır» kezeńinde tálimgerler tobynda qalǵan qatysýshylar arnaıy qoıylym qoıylǵan bir ándi oryndaıdy. Daýys berý nátıjesinde ár komandadan bir nemese birneshe qatysýshy jobadan shyǵady.
Úsh tikeleı efırdiń qorytyndysy boıynsha ár komandadan bir qatysýshy fınalǵa joldama alady. Al shoýdyń fınalynda ár qatysýshy jeke jáne tálimgermen dýette án oryndaıdy.
