Lara Fabıan. Klassıkalyq mýzykadan habary bar adam bul esimdi estigende eleń ete qalady. Qalaı eleń etpeısiz, munsha muńly daýysty kómeıinen órgen ánshiniń kóz janary qosa án aıtyp turǵandaı sanańyzdy sıqyrlaıdy. Onyń ereksheligi sol, kez kelgen shyǵarmany kórermenniń júregine janarymen sińiredi. Ǵajap qoı, tolqyndap kelgen tátti áýen toq soqqandaı keýdeńizdi qars aıyrady. Janyńyz dirildeıdi, sheksiz tebirenesiz… Ásirese álemdi áldılegen «Je t’aime», bizdiń tilge salǵanda «Jú tem» kompozısııasy. Búgin, mine, qaıta tyńdap, sol jaıly tolǵanyp otyrmyz.
Shirkin, Laranyń oryndaýy ózgeshe ǵoı, ózin qurban ete otyryp, kóz monshaǵy úzilip keterdeı shyrqaıdy. Shyǵarma alapat syrdy ishine buǵyp jatqandyqtan ba, baqsańyz, tyńdarman bitken kóz jasyn kóldete tyńdaýǵa qumar. Áıtse de, bul – ánsheıin motıv emes, jeke oqıǵa jemisi. Munda úlken mahabbattyń murasy bar. «Je t’aime» áni avtordyń «Men seni súıemin» degen yntyzar lepesi ǵana emes, eń aıaýly sátterden keshirim suraýy. Úmitsizdik toryna túsken bulbuldyń jan qusasy. О́tkenniń qulaǵyna betoramalyn syǵyp otyryp sybyrlaý, joǵaltqanymen jolyǵyp qalsa, búkpesiz aıtar lala lebizi. «Bárin, basqasha jasaýǵa bolar edi!?» Biraq qalaı?
Toqsanynshy jyldardyń basynda armanshyl jas jigit pen arý qyz Kanadaǵa qashyp ketedi. Ekeýi de azdap aqyn, azdap akter, azdap ánshi degendeı… Qustaı erkin, jelden júırik, jaryqtan jyldam. Olardy alǵa jetelegen – mýzykaǵa degen móldir sezimderi. Astynda eski kólikten basqa eshteńesi joq, kóńilderi dúnıeden ada. Alǵaýsyz, tap-taza nıette álemge qushaq jaımaq. Aradaǵy kirshiksiz syılastyqtary ǵana boıtumar. Sol ekeý – alǵashqy gastroldik saparyna bet alǵan ánshi Lara Fabıan men onyń prodıýseri Rık Alısson edi.
Estelikke súıensek, bir jyldan soń ata-anasynyń jınaǵan qarjysyna alǵashqy albomy jaryqqa shyǵady. Qarshadaı qyzdyń qarlyǵash qadamy – jeke izdenisiniń nátıjesi. Sol tusta bul plastınkadaǵy áýenderdiń keıinirek izdep júrip tyńdaryn eshkim baǵamdaǵan joq. Rık onyń mýzasyna aınaldy, birlese jazǵan ánderin de halyq jyly qabyldady. Lara árbir ánin sahnaǵa sońǵy ret shyǵyp turǵandaı oryndady. Ekeýi egiz qozydaı bir-biriniń jalǵasy boldy.
Tilsiz túsinisý – eki shyǵarmashylyq tulǵanyń ıdealdy odaǵy. Ásem ánderdi dúnıege ákelgen rýhanı odaq. Bul týraly qaýeset jańbyrdan keıingi sańyraýqulaqtaı qaptady. Lara Rıkke Qudaıǵa qalaı qarady, solaı qarady. Al Rık bolsa Larany balasyndaı kórdi. Bir-birine degen ińkárlyǵyn hám qurmetin notamen jetkizdi.
Biraq kóktemniń uzaq bolmaıtyny sekildi qos ónerpazdyń ortasyna jasyn tústi. Sýretshi Pıgmalıon óziniń Galateıasyna ǵashyqtyq hat joldady. Oǵan jaýap retinde Lara «Je t’aime» ánin qaıtardy. Ol aradaǵy mahabbattan da asqaq, mahabbattan da baǵaly syılastyqty tynymsyz tirshiliktiń ezgisine salýdy qalamady. Ony sheksiz súıetinin de jetkizdi, tek áıel retinde emes. Osy sóz Rıkke ajaldan da aýyr áser etti.
Birte-birte bári qulady. Gúl de soldy, kún de batty. Rık ótkendi umytýǵa tyrysyp, baqytyn basqa jaqtan izdeýge shyqty. Lara bolsa ataq qýdy, juldyz aýrýymen aýyrdy, ajyrasty, sátsiz sheshimderdiń shyrmaýyna tústi. Mýzasyn joǵaltty, onymen birge baǵdarshamyndaǵy jasyl tús joǵaldy. Súrindi, qaıta turdy, biraq bári baıaǵydaı bolmady.
Ol máńgilik osy ánmen tynystady, syrqattandy, sol úshin ómir súrdi. Eshqandaı sebepsiz jaqsy kóretinin bar daýsymen aıqaılap ta aıtty. Eshkim estimedi, eshteńe ózgermedi, bári kesh ekenin de bile tura solaı isteýden jalyqpady. Shyǵarmany oryndaǵanda Lara kóz jasyn tyıa almaıdy. Joq, onyń tákapparlyǵy taǵdyryna balta shapqan joq, tek mahabbatty moıyndaýǵa májbúrledi. Ǵajap qoı, á!
«Men seni súıemin». Osy sóılemniń sońyna suraq belgisi qoıylǵany durys pa, joq lep belgisi qoıylǵany jón be? Qalaı oılaısyz? Al siz ne qoıar edińiz? Aıtyńyzshy, Jaryq qyz?!
