Prezıdentke «Qazaqtelekom» AQ kompanııalar tobynyń 2022 jyly qol jetkizgen negizgi qarjy-ekonomıkalyq kórsetkishteri men júzege asyrýǵa josparlaǵan perspektıvti jobalary týraly málimet berildi.
Qýanyshbek Esekeevtiń aıtýynsha, ótken jyly «Qazaqtelekom» AQ-nyń negizgi qarjy jáne ekonomıkalyq kórsetkishteri ósti. Bul bıyl birqatar aýqymdy jobany iske asyrýǵa múmkindik beredi. Olardyń negizgisi 5G jelisin júrgizý jobasy bolmaq. Atalǵan mindetti «MTS» JShS jáne «Ksell» AQ operatorlarynyń konsorsıýmy atqarady. «Qazaqtelekom» aksıonerlik qoǵamynyń enshiles kompanııalary 2027 jylǵa deıin elimiz boıynsha 7 myńnan astam bazalyq stansııa salýǵa tıis. Bıyl Astana, Almaty jáne Shymkent qalalarynda osyndaı 486 stansııa paıdalanýǵa beriledi.
Qasym-Jomart Toqaevqa «Ázerbaıjan – Qazaqstan» baǵyty boıynsha Kaspıı teńiziniń tabany arqyly tartylatyn talshyqty-optıkalyq baılanys jelisiniń qurylysyna qatysty halyqaralyq jobany «AzerTelecom» kompanııasymen birlesip júzege asyrý jumystary jalǵasatyny jóninde baıandaldy. Sonymen qatar bıyl aýyldardy odan ári ınternetpen qamtamasyz etý, Qazaqstan abonentterin eskirgen ADSL jelilerinen optıkaǵa kóshirý, kópqabatty turǵyn úılerdi GPON tehnologııasy arqyly jyldamdyǵy joǵary ınternetke qosý sekildi jobalar iske asyrylady.
Prezıdent halqymyz ben ekonomıkamyz úshin josparlanǵan jobalardy ýaqytyly jáne sapaly oryndaýdyń mańyzdylyǵyna nazar aýdardy. Budan bólek, Memleket basshysy qalalar men aýyldyq jerlerdegi telekommýnıkasııa jelilerin odan ári damytý, sondaı-aq Qazaqstannyń tranzıttik áleýetin arttyrý úshin halyqaralyq derekter trafıginde jelilik ınfraqurylymdy órkendetý jóninde birqatar naqty tapsyrma berdi.
