Aıbek Smadııarovtyń aıtýynsha, 2017 jyldan bastap Qazaqstan Eýropalyq odaqtyń barlyq elderiniń azamattary úshin vızasyz rejım engizdi. Qazirgi ýaqytta SIM vızalyq rásimderdi jeńildetý úshin jáne Qazaqstan azamattary úshin ózara qolaıly tetikterdi ázirleý maqsatynda eýropalyq áriptestermen konsýltasııalardy jalǵastyryp jatyr.
«Qazaqstannyń qandaı da bir tizimge engizilgeni týraly máselege keletin bolsaq, biz eýropalyq taraptan resmı habarlama alǵan joqpyz. Alaıda, jumys tártibinde bizge kelesini habarlady - 1 naýryzdan bastap Qazaqstan Shengen vızasyn berý kezinde budan bylaı azamattary úshin qosymsha konsýltasııalar talap etiletin elderdiń tizbesinde bolady. Sonymen qatar Shengen kelisiminde «qara» nemese «qyzyl» tizim degen uǵym joq, bul ádettegi jumys prosesi týraly aıtylǵan», dedi SIM ókili.
Onyń aıtýynsha, mundaı konsýltasııalar jeti kúnge sozylýy múmkin. Bul rette vızalyq saýalnamalardy jalpy qaraýdyń standartty merzimi burynǵydaı qalady – 15 kúnge deıin.
«Qaıtalap aıtqym keledi - is júzinde bizdiń azamattar úshin vızalardy qaraý rásiminde qandaı da bir ózgerister bolmaıdy. Azamattaryna qatysty qosymsha konsýltasııalar bastalýy múmkin 40 el kiretin tizim «qara tizim» dep atalmaıdy, óıtkeni olardyń arasynda Eýropalyq odaqpen tyǵyz qarym-qatynastary bar jáne qaýipsizdik jaǵynan qolaıly Ortalyq Azııanyń barlyq elderi, Ázerbaıjan, Armenııa, Marokko, Týnıs, Iordanııa, Vetnam sııaqty kóptegen elder kiredi», dep túsindirdi Aıbek Smadııarov.
