Dáris barysynda Bolat Serǵazyuly Álemdik jáne dástúrli dinder kóshbasshylarynyń VII sezi men onyń qorytyndy deklarasııasynyń negizgi habarlamalary is-sharanyń nátıjeleri týraly áńgimeledi. Sezd sheńberinde qabyldanǵan, saıasatkerler, halyqaralyq uıymdardyń jetekshileri qol qoıǵan, qorytyndy qujat sanalatyn deklarasııanyń mindetterin júzege asyrý, ıdeıalaryn odan ári ilgeriletý mańyzdy ekeni aıtyldy.
«Álem halyqtarynyń beıbit ómiri úshin árbir adam óz úlesin qosýy kerek. Sizder tańdaǵan dintaný, teologııa jáne ıslamtaný mamandyqtary – búgingi tańda álemdik deńgeıdegi eń suranysqa ıe mamandyq. Bul mamandyq sizderge álemdegi bolyp jatqan haostardy toqtatatyn, árbir adamnyń júregine jol taýyp, sóngen úmitti jaǵatyn, úzilgen úmitti jalǵaıtyn mol jaýapkershilik júkteıdi. Rýhanı hám tarıhı-mádenı qubylystardy jete meńgerip, adam bolmysynyń ár-qyryna úńiletin dintaný-teologııa salasynyń mamandarynan memleket úlken úmit kútedi.
Qoǵamnyń árbir ókiliniń júregine erteńgi kúnge degen úlken senimge jeteleıtin, durys baǵyt kórsetýge tıis te osy salanyń mamandary. Sondyqtan atalǵan salanyń mamandary tól tarıhymyzdy tereń bilýi kerek. Elimizdiń tarıhy óte baı, ony únemi oqyp, úırenýden jalyqpaýymyz kerek. Tarıhtan sabaq alyp, bolashaqtyń ıgi kádesine jarata bilýimiz kerek. Sizderden týǵan ólkeniń din tarıhyn, salty men dástúr ereksheligin, ulttyq qundylyqtarymyzdyń qalyptasý kezeńderi, tanymdyq erekshelikterimiz sııaqty qubylystardy baǵamdaı alatyn mamandar shyǵady dep úmittenemiz», dedi Bolat Serǵazyuly.
Sondaı-aq ortalyq tóraǵasy ózi basqaryp otyrǵan damytý ortalyǵynyń qyzmetteri jóninde, onyń maqsat-mindetterin, atqarylǵan mańyzdy jumystary týraly málimetter berdi. Stýdentter men magıstranttarǵa N.Nazarbaev Konfessııaaralyq jáne órkenıetaralyq dıalogti damytý ortalyǵy men Ahmet Iаsaýı ýnıversıteti arasyndaǵy memorandým aıasynda óndiristik tájirıbeden ótý múmkindigin paıdalanýdy usyndy.
Kezdesýden soń qonaqtar teologııa fakýlteti stýdentterinniń uıymdastyrýymen ótip jatqan «Naýryz kóje» aksııasyna qatysty.
TÚRKISTAN
