Mazmunǵa baı jınaqta balalarǵa arnalǵan ártúrli taqyryptar qamtylǵan. Otan, otbasy, ana tili, oqý-bilim, án-kúı, adamgershilik qundylyqtary, merekeler, qazaqtyń tyıym sózderi syndy taqyryptar sózimizge dálel.
Ulttyq salt-dástúr, salt-sanaǵa sýarylǵan óleńder bala uǵymyna laıyqtalyp, kórkem naqyshpen bederlengen. Sonymen birge kesteli sýrettermen bezendirilgen aýqymdy jınaq balalardyń ana tiline degen súıispenshiligin arttyryp qana qoımaı, eńbekqorlyqqa shaqyratyny aıqyn.
– Jınaq ata-analarǵa, balabaqsha tárbıeshilerine jáne bastaýysh synyp muǵalimderine arnalǵan taptyrmas kómekshi qural. «400 tátti taqpaq» kitabynyń ereksheligi balalarǵa qajetti barlyq taqyryp qamtylǵan. Bul – balalar úshin rýhanı azyq. Bastaýyshtan bastap 5-synypqa deıingi balalar oqı alady. Ana tilimizdi balalardyń sanasyna sińirip, onyń qasıetin sezinip ósýine óte paıdaly kitap, – deıdi aqyn Baıanǵalı Álimjanov.
Kitapqa engen óleńderdiń ustyny berik bolǵasyn, árbir óleń irgeli, mazmundy. Máselen, «Bilim – kúsh» atty óleńde:
«Myqty bolsa bilegiń,
Kúreskende jyǵarsyń.
Biraq bilim bárinen,
Kúshti ekenin uǵarsyń.
Bilim sheksiz qazyna,
Qumarlanyp, qurmette.
Umtyla ber toqtaýsyz,
Bilgen saıyn bilmekke!»
– deıdi aqyn.
Jınaqqa engizilgen óleńder uǵymǵa jeńil, jattaýǵa yńǵaıly, oıda tez qalady. Ár shýmaqtan ulttyq tálim-tárbıeniń ıisi burqyrap tur.
Sirá, balalar álemi kózge jeńil, ońaı kóringenimen, balalar poezııasy kúrmeýi qıyn, kúrdeli janr. Ol úshin bala bolyp oılanyp, bala bolyp tolǵanýyńyz qajet. Al balalyq aspanynan uzap, jan dúnıesi sábılik samaldan uzaqtaǵandar úshin balalarsha oılaný múmkin emes.
Bul turǵydan kelgende «400 tátti taqpaq» – áýezi kórkem, uǵynyqty, qysqa da nusqa tartymdy eńbek. Baldyrǵandardyń otbasyn, qasıetti Otanyn, ana sútimen berilgen týǵan tilin súıýge úndeıtin kitap. Jınaqtyń alǵashqy betinde-aq menmundalap kózge túsetin «Men – qazaqtyń balasy» atty taqpaqta búı deıdi.
«Baıtaq jatqan dalasy,
Batyr bolǵan babasy.
Aqpeıildi, aqyldy,
Men – qazaqtyń balasy!
Atyn jattap ósemin,
Ańyzymen atanyń.
Darqan dala, keń dala,
Meniń týǵan Otanym!»
Júrekke jyly tıgen osy qos shýmaqta ulttyq rýh, el ulaǵaty, baba taǵylymy kórinis tabady.
Sonymen birge jınaqta «Taqııa», «Tymaq», «Besik», «Saba mıen taba», «Qara qazan» sekildi qundylyqtarymyzǵa sýarylǵan jyrlar bar. Aqyn jınaǵy tek búgingi ýaqytqa ǵana emes, bolashaq urpaqqa da qyzmet eteri sózsiz.
Qoryta aıtqandaı, balalarǵa bazarlyq retinde usynylǵan «400 tátti taqpaq» jınaǵy baldyrǵandardyń balań kóńilin, taza sanasyn jaqsylyqqa úndep, jamandyqtan jırendirip, otansúıgishtikke, adaldyqqa, adamgershilikke shaqyratyn, ulttyq qundylyqtarymyzdyń mánin uǵýǵa tárbıeleıtin erekshe kitap. Bul jınaq avtordyń rııasyz peıilmen balalarymyzǵa jasaǵan keremet bazarlyǵy, tamasha syılyǵy boldy dep senimmen aıta alamyz.
