Qazirgi ýaqytta tańbalaý jáne qadaǵalaý aqparattyq júıesinde aıaqkıim saýdasymen aınalysatyn 2 myńnan astam kásipker tirkelgen. 2023 jyldyń naýryz aıynda 6 145 348 aıaqkıim tańbalaý kodyna tapsyrys berildi. Al 2023 jylǵy sáýirdiń 1-21-i aralyǵynda tapsyrys berilgen aıaqkıim kodynyń sany 15 853 844 jetti. Bir aıǵa jeter-jetpes ýaqyt ishinde atalǵan kórsetkish 257 paıyzǵa ósken. Bul aınalymnyń ashyqtyǵyn arttyrýǵa baǵyttalǵan júıege bıznestiń belsene atsalysyp otyrǵanyn kórsetedi.
Júıede jumys isteıtin jáne taýardy tańbalaý boıynsha tikeleı tájirıbesi bar kásipkerlerdiń aıtýynsha, sıfrlyq tańbalaýdy engizý tutynýshy úshin aıaqkıimniń túpkilikti qunyna áser etpegen.
«Mindetti tańbalaý engizilgennen beri aıaqkıim tańbalaýmen aınalysyp, olardy bólshek saýda dúkenderimizde satamyz. Biz tek taýarlardy tańbalaý jáne qadaǵalaý aqparattyq júıesi men 1S júıelerin ıntegrasııalaý modýlin engizý kezinde ǵana shyǵyndaldyq. Tıisinshe, satylymdaǵy aıaqkıimniń baǵasyn 1 teńgege de kótermedik. Osylaısha, tańbalaýdyń engizilýi túpkilikti baǵaǵa áser etken joq. Biryńǵaı operator bizben únemi baılanysta jáne biz olardan tańbalaý júıesiniń jumysy boıynsha egjeı-tegjeıli jaýaptar alamyz, óz eskertýlerimiz ben usynystarymyzdy aıtamyz», deıdi «Sman» jáne «Bayman» taýar belgileri bar «Bayman Group Qazaqstan» kompanııalar tobynyń qoıma jáne logıstıka jónindegi dırektory Oljas Súgirov.
Buǵan deıin Qazaqstanǵa «Iýnıchel» saýda belgisimen aıaqkıim ákeletin «Kaspıı-obýv» JShS ókilderi de júıedegi jumystardyń qoljetimdiligi týraly pikir bildirgen bolatyn:
«Biz aıaqkıim ónimderin tańbalaý engizilgennen bastap, ıaǵnı 2021 jylǵy qarashadan beri taýarlardy tańbalaý jáne qadaǵalaý aqparattyq júıesinde jumys isteımiz. Tańbalaý úderisiniń barlyq kezeńin qarastyrdyq jáne prosedýralarǵa sáıkes birqalypty jumysty júıelep aldyq. Jumysymyz Reseı Federasııasymen ózara tanylǵan kodtardyń fýnksııasy arqyly da jetildirildi: ýaqyt aıtarlyqtaı qysqardy jáne aıaqkıimdi ákelý úderisteri jeńildetildi. О́nimdi tańbalaý júıesin oń baǵalaımyz jáne aıaq kıim naryǵyndaǵy básekelestik áldeqaıda ádil bolady dep úmittenemiz. Bizdiń kompanııa tańbalaý úshin artyq shyǵynǵa tap bolǵan joq», degen edi «Kaspıı-obýv» JShS basshysy Larısa Sıtarova.
Taýarlardy sıfrlyq tańbalaý jáne qadaǵalaý júıesiniń basty maqsaty Qazaqstandaǵy saýdany ashyq etý ekenin eske sala keteıik.
«Qazir taýarlardy tańbalaý jáne qadaǵalaý júıesinde aıaqkıim saýdasymen jáne óndirisimen aınalysatyn kásipkerlerdiń joǵary belsendiligi baıqalady. Bul adal bıznestiń zańda belgilengen erejelerge sáıkes jumys isteıtinin kórsetedi. Tańbalaý jáne qadaǵalaý júıesiniń mindeti – Qazaqstandaǵy taýar aınalymyn ashyq etý jáne aıaqkıim ónerkásibinde 50 paıyzǵa jýyqtaıtyn kóleńkeli ekonomıka statıstıkasyn azaıtý. Naryqtyń aǵarýy sanaly kásipkerlerdiń damýyna jáne halyqtyń ál-aýqatyna tikeleı áser etedi. Buǵan bıznes te jaýapty», deıdi Indýstrııa jáne ınfraqurylymdyq damý mınıstrligi Indýstrııalyq damý komıteti Jeńil ónerkásip basqarmasynyń basshysy Aıjan Ádilova.
Aıaqkıim ónimderin sıfrlyq tańbalaý jáne qadaǵalaý 2021 jyldyń 1 qarashasynan bastap engizildi. Osy kezeńnen bastap kásipkerler beıimdelý kezeńine qatysty kóptegen jeńildik aldy. Al 2023 jylǵy 1 sáýirden bastap aıaqkıimdi tańbalaý jáne qadaǵalaý erejeleri tolyq kúshine endi. Zańnamada aıaqkıimdi tańbalaý erejelerin buzǵany úshin aıyppul qarastyrylmaǵan.
