Saltanatty jıynǵa Astana qalasy ákiminiń orynbasary Eset Baıken, qalalyq sport basqarma basshysy Samat Jylqybaev, bokstan olımpıada oıyndarynyń chempıony, Qazaqstan sportshylar odaǵy Prezıdıýmnyń Tóraǵasy Serik Sapıev jáne bokstan Atlanta jáne Sıdneı olımpıada oıyndarynyń kúmis júldegeri Bolat Jumadilov qatysty.
Astana qalasy ákiminiń orynbasary Eset Berikuly sportshylarmen tildesip, jarys aldynda sáttilik tilep, qala namysyn qorǵaıtyn sportshylarǵa qoldaý bildirdi.
«Elimizde altynshy ret ótkeli turǵan Paralımpıada oıyndarynda sizderge sáttilik tileımin. Prezıdenttiń buqaralyq sport túrlerin damytý boıynsha berilgen tapsyrmasy júıeli túrde oryndalyp jatyr dep aıta alamyz. Astanada parasport túrleri jaqsy damyp keledi. Aldaǵy ýaqytta jaqsy nátıje kórsetip, elordamyzdyń mártebesin kótere berińizder. Sporttyq mansaptaryńyz jaqsy nátıjege toly bolsyn», dedi quttyqtaý sózinde qala ákiminiń orynbasary Eset Baıken.
Qala ákimi orynbasarynyń quttyqtaý sózinen keıin bokstan Atlanta jáne Sıdneı Olımpıada oıyndarynyń kúmis júldegeri Bolat Jumadilovke Memleket basshysynyń quttyqtaý hatyn tabystady.
Uıymdastyrýshylardyń aıtýynsha paralımpıadalyq oıyndar − elimizde tórt jylda bir ret ótetin iri keshendi jarystardyń biri.
Sondaı-aq jıynda bokstan Olımpıada oıyndarynyń chempıony Serik Sápıev te parasportshylarǵa tilegin jetkizdi.
«Úsh kezeńnen turatyn saıys 10-30 mamyr aralyǵynda Almaty, Astana jáne Aqtóbe qalalarynda para fýtbol, golbol, jeńil atletıka, para paýerlıftıng, para taekvondo, para oq atý, para ústel tennısi, para dzıýdo, para voleıbol, para júzý sport túrlerinen ótedi. Tórt jylda bir ret ótetin sporttyq dodaǵa elorda qurama komandasynan 66 sportshy Astana qalasynyń namysyn qorǵaıdy. Jalpy paralımpıadalyq oıyndary 3 kezeńnen turady.
Iаǵnı, birinshi kezeńi 10-18 mamyr aralyǵynda Almaty qalasynda jeńil atletıkadan ótse, ekinshi kezeńi Astana qalasynda 16-22 mamyr aralyǵynda para oq atý, para paýerlıftıng, para taekvondo túrlerinen ótpek. Al, úshinshi sońǵy kezeńdi Aqtóbe qalasynda 20-30 mamyr aralyǵynda para ústel tennısi, para júzý, para dzıýdo, para voleıbol sport túrlerinen bolady», dedi Astana qalasynyń Múgedek sportshylarǵa arnalǵan sport mektebiniń basshysy Azamat Taǵaev.
Jıyn sonyńda para ústel tennısinen QR sport sheberi Stepanova Aleksandra men para dzıýdodan QR birneshe dúrkin júldegeri Gúldebaev Qaıyrly qurama múshelerine sáttilik tilep, jaqsy nátıje kórsetýdi tiledi.
Aıta keteıik, úsh kezeńnen turatyn saıys 10 mamyr kúni Almaty qalasynda bastaý alady. Ári qaraı bul oıyndar Astana jáne Aqtóbe qalalarynda mamyrdyń sońyna deıin jalǵasady.
