«...Aıdaýdan týǵan elin, jerin ańsap, saǵynyp kelgen Seıtek, aýyldaǵy jora-joldastaryn aralap, óziniń súıikti óneri dombyrasyn tartyp, biraz ýaqyt tynyshtyq ómirde bolady.
Seıtektiń aıdaýdan oralý habary bul aımaqqa tez taralady. Halyq lek-legimen jınalyp, onyń kúıin tyńdaıdy. Alys sapardan, aýyr joldan qaıtqan Seıtek, endi kúı ústine kúı qosady. Aıdaý, túrme, kórgen qorlyq, týǵan jer, ushqan uıany saǵynǵan júrek – bári qosylyp, dombyranyń kómeıinen tolqyndalǵan kúı bolyp tógiledi. Alqaqotan otyrǵan áleýmetine Seıtek: «Aman-esen oralǵanyma qýanamyn. Senderdi kórip, aldaryńda kúıimdi tartqanyma maqtanamyn. Halyq turǵanda, on saýsaqtyń óneri turǵanda, Seıtek áli sizdermen birge bolady. Sonaý Sibirde júrgenimde biraz kúıler shyǵyp ta qalyp edi, sonyń birin tyńdańyzdar», dep dombyrasyn qaǵa beredi.
Dombyranyń qos isheginen kúńirene shyqqan qaıǵyly ún, ár perneni basqan saıyn saýsaqtarynyń astynan estilgen zarly saz tyńdaýshylardyń jan dúnıesin tebirentedi.
Ásirese, kúıshi qoly dombyranyń ortańǵy jáne saǵa bólimderine qaraı jyljyǵanda shyǵatyn ashy dybystardan, adamnyń ashýly kegi, ashynǵan yzǵarly úni estilgendeı bolady.
Seıtektiń sondaǵy tartqany «Zaman-aı» kúıi edi.
Jetkizýshi – Tymat MERǴALIEV
Derekkóz: Kúı ańyzy
