Álem elderi toleranttylyqtyń tórge ozýy, qoǵamdyq kelisim men turaqtylyqtyń saltanat qurýy úshin qandaı qadamdarǵa barýǵa tıis? Ulttyq jáne dinı dıskrımınasııamen jáne tózimsizdikpen qalaı kúresemiz? Osy syndy ózekti máselelerdiń túıinin tarqatý úshin birneshe memlekettiń salalyq vedomstvolar basshylary el astanasy Ábý Dabıde bas qosty. Ǵalamdyq taqyryp arqaý bolǵan jıynǵa Aqparat jáne qoǵamdyq damý mınıstri Darhan Qydyráli arnaıy qatysyp, kúlli adamzattyq baýyrlastyq pen tatýlyq jaıynda oı qozǵap, elimizdegi ultaralyq jáne dinaralyq kelisim úlgisin kópshilikke pash etti.
– О́zderińizge belgili, XXI ǵasyrdaǵy álem jurtshylyǵyn dúrliktirip otyrǵan syn-qaterlerge toıtarys berýde toleranttylyq, adamı baýyrlastyq, tatýlyq qundylyqtary erekshe mánge ıe. Biz bul qasterli qundylyqtyń qadir-qasıeti men mán-mańyzyn kúni keshe dúnıe júzin áp-sátte sharpyp ótken koronavırýs indeti kezinde baıqadyq. Bir qoǵamda ómir súre otyryp, júris-turysy shektelip, vırtýaldy baılanysqa túsken kezde, tanys ta beıtanys adamdar ózara túsinistik tanyta otyryp qana osy qıyndyqty eńserdi, – dedi mınıstr.
Ol Qazaqstandaǵy etnosaralyq jáne konfessııaaralyq kelisimdi nyǵaıtý úshin atqarylyp jatqan jumystar týraly keńinen baıandady.
– Birikken Ulttar Uıymynda basqarýshy qyzmet atqarǵan Prezıdent Qasym-Jomart Toqaev álemniń kún tártibindegi ózekti máseleler men eldegi tynyshtyqtyń turaqty bolýyna únemi nazar aýdaryp otyr. Buǵan qosa, Qazaqstan Álemdik jáne dástúrli dinder kóshbasshylarynyń dıalog alańyna aınaldy. Din qaıratkerleriniń basyn qosatyn túrli dinder kóshbasshylarynyń sezi 2022 jyly Astanada jetinshi ret ótkizildi, – dedi D.Qydyráli.
Sondaı-aq mınıstr toleranttylyqty nasıhattaýda buqaralyq aqparat quraldarynyń mańyzyna erekshe toqtaldy. «Medıada arazdyq tiliniń qoldanylmaýyn qadaǵalap, kerisinshe, eldi birlikke, tatýlyqqa úndeýde, halyqty rýhanı jaqyndastyrýda aqparat quraldarynyń róli zor. Búgingi konferensııa da osy maqsattyń oryndalýyna óz úlesin qosady dep senemin jáne uıymdastyrýshylarǵa alǵys aıtamyn», dedi mınıstr.
Jıyn sońynda Aqparat jáne qoǵamdyq damý mınıstri D.Qydyráli men BAÁ-niń Toleranttylyq jáne qatar ómir súrý mınıstri Nahaıan ben Mýbarak Ál-Nahaıan ózara yntymaqtastyqty nyǵaıtý týraly memorandýmǵa qol qoıdy.
Bul qujat qoǵamdaǵy toleranttylyq pen kelisim qundylyqtaryn nasıhattaýdy kózdeıdi. Atap aıtqanda, jastardyń boıynda toleranttylyqty qalyptastyrý, dinı ekstremızmge qarsy kúres jáne adamı qundylyqtardy ilgeriletý máseleleri boıynsha birigip jumys isteý jaıy qaralǵan.
