Dálirek aıtqanda, depýtat kelesi máselelerdi qarastyrýdy surady:
- ıadrolyq synaqtar saldarynan zardap shekken azamattarǵa mindetti medısınalyq saqtandyrý jarnalaryn memleket atynan júzege asyrý;
- ıadrolyq synaqtardan zardap shekken, biraq eldiń basqa óńirlerine kóship ketken azamattarǵa zańnamamen kózdelgen barlyq quqyqtar men jeńildikterdi usyný;
- zardap shekken azamattarǵa beriletin ústemeaqylardyń barlyq túrlerin eki esege ulǵaıtý jáne jyl saıynǵy qosymsha eńbek demalysyn tóleýge memlekettik qoldaý kórsetý;
- barlyq zardap shekken azamattarǵa tolyq keshendi medısınalyq tekserý júrgizý jáne medısınalyq ońaltý uıymdarda emdelýin qamtamasyz etý;
- ońaltý ortalyqtary men mamandandyrylǵan shıpajaılardyń sanyn kóbeıtý.
«Zeınetaqyǵa ústemeaqy alý quqyǵy tótenshe radıasııalyq qaýipti jáne eń joǵary radıasııalyq qaýipti aımaqtarda turyp jatqandarǵa jáne 1998 jylǵy 1 qańtarǵa deıin zeınetke shyqqandarǵa berilgen. Al radıasııadan zardap shegip, basqa aımaqtarǵa kóship ketken jáne zeınetke 1998 jylǵy 1 qańtardan keıin shyqqandarda bundaı quqyq joq. Qosymsha eńbekaqy jáne jyl saıynǵy qosymsha aqyly demalys tek qana zardap shekken aımaqtarda turyp jatqan azamattarǵa ǵana beriledi. Basqa aımaqtarǵa kóship ketken azamattar bul quqyqtarmen qamtamasyz etilmegen. Barlyq jumys berýshiler jyl saıynǵy qosymsha demalysty tóleı almaıdy jáne basqa da qajetti tólemderdi tolyq qamtamasyz etpeıdi, sebebi bul úshin qarjylyq múmkindikter joq», deıdi depýtat.
Depýtattyń sózinshe, zardap shekkenderdiń barlyǵy ýaqtyly medısınalyq tekseristen ótpegen jáne olarǵa tıisti dıagnostıka jasalmaǵan. Ońaltý ortalyqtarynda da em alý qoljetimsiz.
Sonymen qatar, depýtattyń málimetine súıensek, jıi kóteriletin máselelerdiń biri - zeınetke shyǵý jasyn tómendetý. Oǵan qosa, zardap shekken azamattardyń kópshiligi turaqty jumys ornynda eńbek etpeıdi. Osyǵan baılanysty, olar mindetti medısınalyq saqtandyrý jarnalaryn tóleı almaıdy.
