Atalǵan sharýashylyq dándi, maıly daqyldar ósirýmen jáne mal sharýashylyǵymen aınalysady. Ieliginde 15,8 myń gektar egistik alqaby, 4,2 myń gektar jaıylymdyq jeri bar. «Daıyndyq Agro» dırektory Birjan Sháımerdenov bıyl bıdaıdyń aýstrııalyq «Trızo» sortyn egip, gektarynan 25 sentner ónim alýdy josparlap otyrǵanyn aıtty.
Prezıdentke kóktemgi egis naýqanynyń barysy jóninde málimet berildi. О́ńir basshysy Aıdarbek Saparovtyń aıtýynsha, egistik alqaptaryna mıneraldy tyńaıtqysh jetkizý, kóktemgi egis jumystaryna tehnıka qarastyrý, dıqandardy janar-jaǵarmaımen qamtamasyz etý isi josparǵa saı oryndalyp jatyr.
Memleket basshysy eńbek ónimdiligin arttyryp, aýyl sharýashylyǵyna jańa tehnologııalar men óndiris tásilderin engizý mańyzdy ekenine nazar aýdardy. Sondaı-aq Prezıdent oblys basshylyǵyna osy baǵyttaǵy jumysty odan ári jalǵastyrýdy jáne aýyl sharýashylyǵy ónimderin óńdeý isin damytýdy tapsyrdy.
Prezıdent dıqandardyń eksporttyq suranysy joǵary daqyldardy ósirýge beıimdelgenin atap ótip, sharýalardyń eńbegine oń baǵa berdi.
Memleket basshysy dıqandardyń kóktemgi egis naýqanyn sátti atqarýyna tilektestik bildirdi.
