Ábilqaıyrlyqtar buǵan deıin táýelsizdik alǵaly tátti sýdyń dámin tatpadyq dep shý shyǵarsa, endi áleýmetti ábigerge salǵan avtojoldyń máselesin kim sheshedi degendi alǵa tartyp, kúńirenip otyr.
Toz-tozy shyqqan shuryq tesik joldyń sıqyn kórgende, rasymen de shoshısyń. Aıtýlarynsha, bastary aýyryp, baltyry syzdaǵan shaqta eldi mekenge jedel járdem shaqyrý da muńǵa aınalǵan. Oıdym-oıdym jolǵa túsken kólik aýylǵa keshigip keletini álimsaqtan aıan. Qysqasy, atalǵan aýyldardyń turǵyndary órkenıet aıasynan tys jerde ómir súrip jatyr ma degen oıǵa shomasyń.
«Áskerge attanǵanymda aýyldyń joly áp-ádemi bolatyn. Odan keıin qanshama ýaqyt ótti deseńizshi. Bul jolǵa eshkim nazar salǵan emes. Aýylǵa taksı jaldasań, joldyń tozǵanyn alǵa tartatyn kólik júrgizýshileri kem degende 5 myń teńge suraıdy. Jolymyzdyń dal-duly shyqqandyqtan, jedel járdem shaqyrýdy da qoıdyq. Qysqasy, jaǵdaı máz emes», deıdi Ábilqaıyr aýylynyń turǵyny Qanat Mahatov jyrǵa aınalǵan avtojol máselesi týraly oıymen bólisip.
Qalaı alyp qarasaq ta, aýyl turǵyndarynyń ýáji oryndy. Aýyz sýdan qamyqqan halyq endi avtojoldyń azabyn tartýǵa májbúr. Eldi meken turǵyndarynyń ótkir máselesine jergilikti atqarýshy bılik jedel den qoısa deısiń...
«Aýyldaǵy aǵaıynnyń qandaı qıyndyq kórip júrgenin seziný úshin avtokólikke otyryp, osy jolmen bir júrip ótseńder bárin túsinesińder. Azapqa salǵan avtojoldyń sıqy osy. Oıdym-oıdym, shuńqyr-shuńqyr bolyp jatyr. Toz-tozy shyqqan avtojol turǵyndardyń júıkesin tozdyryp bitti. Alǵan kólikteri shydas bermeı shashylyp qalady. Qosalqy bólshekterdi qoıshy, kóliktiń esikteri de qırap jatady. Jergilikti halyqtyń shamyna tıgen jol máselesin sheshetin jan tabylar ma eken?», deıdi Qonaev aýylynyń turǵyny Erjan Tynybekov ashynyp.
Aýyl halqynyń júıkesine shı júgirtken avtojol máselesin sheshýge aýdandyq ákimdik qaýqarsyz. Aýdandaǵylardyń aıtýynsha, oblystyq mańyzy bar jolǵa olardyń qatysy joq. Al avtojoldyń máselesine jaýapty oblystyq basqarma ókilderi asfalttyń der kezinde jóndelmeýine merdiger kompanııalar kináli degendi alǵa tartady. Olar keltirgen derekke sensek, joldyń máselesine jaýapty eki kompanııa biraz ýaqyt buryn ózara sottasqan. Keıinnen memlekettik satyp alý boıynsha jumysynda aǵattyq ketkeni anyqtalyp, bólingen qarajat bıýdjetke keri qaıtarylǵan.
Qysqasy, óńirlik ákimdik aýyl turǵyndaryn mazalaǵan joldy jóndeý jumystaryn ekinshi ret qolǵa almaqshy. Aıtýlarynsha, jergilikti halyqtyń talabynan týyndaǵan másele kúreń kúz mezgili jaqyndaǵanda sheshiledi eken. Jalpy, jyl sońyna deıin óńirde 137 shaqyrym jol orta deńgeıde jóndeýden ótkizilmek.
«Qazirgi tańda merdiger anyqtaldy. Joldy jóndeý jumystarymen «Raýan» JShS aınalysady. Búginde tehnıkalyq qadaǵalaýshyny anyqtaý maqsatynda memlekettik satyp alý resimderi júrgizilip jatyr. Aýyl azamattaryn alańdatqan avtojol máselesi eki aıdyń shamasynda sheshimin tabady», deıdi oblystyq turǵyn úı kommýnaldyq sharýashylyq, avtomobıl joldary basqarmasynyń ókili Oljas Orynbekov jaǵdaıdy túsindirip.
Otyz jyldan asa ýaqyt boıy avtojoldyń azabynan mezi bolǵan aýyl jurtynyń armany rasynda da eki aıda sheshile me? Álde saǵyzsha sozylǵan kóp jumystyń biri sekildi merzimi uzaı bere me? Ol jaǵyn, álbette ýaqyt kórsetedi.
Jambyl oblysy,
Turar Rysqulov aýdany
