Foto: El.kz
Bıyl Ulytaý oblysynda 1812 jáńa páterdiń kilti tapsyrylýy tıis. Oblystyń qalalary men aýdandarynda jalpy kólemi 120 myń sharshy metrdi quraıtyn 28 kópqabatty turǵyn úı qurylysynyń ishinde 14 kópqabatty turǵyn úı respýblıkalyq bıýdjet qarajaty esebinen boı kóteredi.
Jezqazǵan qalasynda 298 páterli 6 turǵyn úı salynady. Al Sátbaev qalasynda 3 turǵyn úıdiń qurylysy bastalyp ketken.
Sonymen birge oblystyń Jańaarqa aýdanynda 5 turǵyn úıden kelesi jylǵa deıin 228 páter kilti tabystalady.
Atalǵan josparlardan bólek jeke qurylys salýshylarmen Jezqazǵan torabynda 4 úı, Sátbaev qalasynda 2 turǵyn úı qurylysyn bastaý josparda bar.
«Oblys boıynsha 5000-nan astam adam baspana kezeginde tur, ol úshin biz qalalyq jáne respýblıkalyq bıýdjetten aqsha suratyp jatyrmyz. Respýblıkalyq bıýdjetten 7 nesıelik úı salýǵa ótinim ótkizip qoıdyq, qazir sony kútip otyrmyz. Odan bólek jeke kásipkerlerdiń salyp jatqan úıleri bar», dep málimdedi Ulytaý oblysynyń qurylys, sáýlet jáne qala qurylysy basqarmasy basshysynyń m.a. Baqtııar Pardabekov.
Sondaı-aq bıyl Prezıdenttiń tapsyrmasyna sáıkes ortalyq memlekettik jáne quqyq qorǵaý organdarynyń bólimshelerine ornalastyrylǵan memlekettik qyzmetshilerdi turǵyn úımen qamtamasyz etý úshin QR Úkimetiniń rezervi esebinen 11 kópqabatty turǵyn úıdiń qurylysyn bastaý josparlanǵan.
