Jalpy, Ýkraınadaǵy soǵys Reseıdegi tanymal medıa tulǵalardyń arasyna jik túsirip, «kimniń kim» ekenin aıqyndaýǵa kelgende taptyrmaıtyn «quralǵa» aınaldy. Azamattyq ustanymy men qundylyq qaǵıdasy sáıkes kelmegeni úshin Otanyn tastap ketýge májbúr bolǵan orystyń ár tanymal tulǵasynyń artynda bir esekke emes, ǵumyryna jeterlik aıyp pen qarǵys, qoǵamdyq qýdalaý men materıaldyq shyǵyn eńsesine salmaq salýda. Onyń taǵy bir mysaly, osy eldegi belgili qandasymyz, kópshiliktiń súıiktisine aınalǵan syqaq óneriniń sańlaǵy Nurlan Sabyrovtyń Ýkraına taqyrybyndaǵy orynsyz ázili úshin jeli betinde júndeı tútilip, aqyry akkaýntyn jaýyp, Amerıkadaǵy týr-saparyn toqtatýǵa májbúr boldy.
Salystyrmaly túrde alǵanda, bizdiń elde jańa úrdis bolyp bastalǵanymen, syrt elderde munyń san alýan atyshýly oqıǵasy bar. Ar-namysty aıaqqa taptaý, ultty qorlaý, azamattyq, násildik kemsitýge jol berý, aınalasynan qysym kórý, tilinen jazyp, artyq sóz aıtýdyń sońyn sıpattaıtyn «harassment», «býllıng», «abıýzment» termınderimen qazir ekiniń biri tanys. Abaılamaǵan adam qasyqtap jınaǵan abyroıynan, densaýlyǵynan, otbasynan, qyzmetinen, mıllıon dollarlyq jarnama kelisimsharttarynan bir-aq mezette aıyrylyp jatyr. Sońynan tizerlep turyp keshirim suraǵanymen bári de kesh, eldiń bári qanaty kúıip, kúldiń ishinen qaıta kóterilgen Fenıks qusy sııaqty sottan sotqa júginip, sumdyqtyń oty men tozaǵyn keship júrip, ádildik pen abyroıyn aqtap alǵan ataqty kınojuldyz Djonnı Depp emes. Jeńiske qol jetkizip, aqtalǵanymen alpaýyt kompanııalar onymen burynǵydaı jumys istegisi kelmeıdi, tıimdi, qymbat jobanyń bári odan qıys ketip jatyr.
Dúnıejúzilik qundylyqtarǵa sholý jasaıtyn WVS zertteý jobasy júrgizgen nátıjege qaraǵanda, qazaqstandyqtar usaq quqyq buzýshylarǵa áli de bolsa kóz jumyp qaraıdy eken. Tipti 77 memleket turǵyndarynyń arasynda júrgizilgen «bıletsiz jol júrýge qalaı qaraısyz?» degen qarapaıym saýalǵa Qazaqstan respondentteri «qoıandy» aqtap alý jaǵynan jetinshi orynnyń nátıjesin kórsetken. Osyndaı nazar aýdarýǵa turmaıtyn usaq nárseniń ózi ýaqyt óte kele zardaby aýyr soǵatyn aýqymdy qylmystarǵa aýysýy ábden múmkin ekenin bilip turyp, keı adam joq jerden obal-saýapty oılaı qalady. Tipti otbasyndaǵy zorlyq-zombylyq, turmystyq kıkiljińderdi talqylaıtyn eldegi eń iri telearnalardaǵy tok-shoýlarda eki tarapty tatýlastyrǵysy keletin júrgizýshi «keshirimmen qaraıyq pa?» dep kórermenge saýal tastasa, Jumataı Sabyrjanov aıtqandaı, «adam deıin deseń, sııaǵy joq, mal deıin deseń, tuıaǵy joq» zorlyqshyl qylmyskerge keshirimmen qarap, jaqtasyp jatady. Tek talantty bolǵany úshin, el aldynda ónerde júrgen tanymal tulǵa bolǵany úshin ǵana qylmysyn eleýsiz qaldyrýǵa tyrysyp, basynan sıpap, jónine jiberetin de bizdiń el. Ári qaraı quddy eshnárse bolmaǵandaı, qolaıly qyzmetke tuıaq iliktirtip, jaıly ómir súrýine jaǵdaı jasap, lajy bolsa, ósip, órkendeýine de múddeles. Memleket qazynasyn mıllıondap jutyp jatqan jemqorlardyń ilýde biri qaqpanǵa iligip, isi sotqa deıin jetip jatqanyn kóre tura, abaqtyǵa qımaı, aıaýshylyq bildirip, aqtap alýǵa ıkemdelip turatynyn ózimiz bolmasaq, ózge jurt qaýashaǵyna salyp qansha shaıqasa da, qabyldaı almas.
Jeke tulǵaǵa tutqıyldan jasalatyn shabýyl kezinde óre túregeletin, qarjy múddesin kózdegen «saýdager bottar toby» keıingi kezde belsendi kúsh aldy. Azyn-aýlaq tıyn-teben, keıde qomaqty aqsha úshin zańǵa qaıshy kez kelgen isti aqtap, ádildik, aqıqatty shimirikpesten aıaqasty etip beredi. Qoǵamǵa tikeleı qaýip týǵyzatyn osylardyń kesirinen jelidegi jeńis, «qabyl almaý ádebi» tolyq qýatyn tanytýǵa qaýqarsyz, qor bolyp jatady.
