Atalǵan jádigerdi Ulttyq mýzeıge tapsyrý rásiminde Mádenıet jáne sport vıse-mınıstri Arman Júdebaev jınalǵandardy Abaı kúnimen quttyqtap, jyly lebizin bildirdi.
– Búgin Ulttyq mýzeıdiń qory uly aqynǵa qatysty taǵy bir jádigermen tolyǵyp otyr. Bul Semeı qalasynda mesenat Bekbaı Baıysovtyń kerýen saraıynda turǵan, Abaı Qunanbaıuly, basqa da qazaq zııalylary shaı ishken samaýryn. Atalǵan tarıhı jádigerdiń taǵy bir qundylyǵy Semeıde Abaı atyndaǵy alǵashqy mýzeı ashylǵanda sol jerdegi ekspozısııaǵa uly aqyn paıdalanǵan qundy buıym retinde qoıylǵan. Sondyqtan bul tarıhı jádigerdiń elimizdegi eń iri mádenı mekemesi – Ulttyq mýzeıge tapsyrylýy keleshek urpaq úshin mańyzdy dep sanaımyz, – dedi ol.
Onyń aıtýynsha, atalǵan samaýryndy qosa alǵanda uly aqynymyzǵa qatysty 43 qundy jádiger bar.
Vıse-mınıstr sala atynan Halyqaralyq mádenıet pen ónerdi qoldaý qoryna alǵys bildirdi.
– Mádenıet jáne sport mınıstrliginiń atynan Abaı atyndaǵy Halyqaralyq mádenıet pen ónerdi qoldaý qoryna qundy jádigerdi bizge amanatqa tapsyrǵany úshin alǵys bildiremin, – dedi Arman Júdebaev.
Is-shara barysynda Abaı atyndaǵy Halyqaralyq mádenıet pen ónerdi qoldaý qory, qoǵamdyq keńesiniń sheshimimen belgili mesenat Bekbaı Baıysovtyń nemeresi Asqar Bekbaev «Abaı» mereıtoılyq medalimen marapattaldy.
Atalǵan is-sharany uıymdastyrýdaǵy maqsat – ultymyzdyń uly oıshyly Abaı Qunanbaıulynyń ulttyq ıdeıalarǵa toly asyl-muralaryn dáripteý, mýzeıge kelýshilerdiń nazaryna qundy jádigerdi kórýine múmkindik berý, keıingi urpaqtyń taǵzym etip, uly aqynnyń shyǵarmashylyǵy men eńbegine degen qyzyǵýshylyǵyn arttyrý.
