Foto: Úkimettiń baspasóz qyzmeti
Kezdesý barysynda Úkimet basshysy qaza tapqan kenshiler otbasylarynyń qaıǵylaryna ortaqtasyp, kóńil aıtty.
«Sizderdiń orny tolmas qaıǵylaryńyzǵa ortaqpyz», dedi Álıhan Smaıylov.
Úkimet basshysy Memleket basshysynyń tapsyrmasy boıynsha shahtadaǵy apattyń sebepterin egjeı-tegjeıli zertteıtin arnaıy komıssııa qurylǵanyn atap ótti.
«Jaýapty tulǵalardyń barlyǵy tıisti túrde jazalanady. О́tken jyly da osyndaı jaǵdaı bolǵan. Ol kezde basshylyq barlyq qajetti sharany qabyldap, eńbek qaýipsizdigin qamtamasyz etýge, ınvestısııa salýǵa ýáde bergen edi. Biraq, kórip otyrǵanymyzdaı, qaıǵyly oqıǵa qaıtalanyp otyr, qajetti kólemde qarajat bólinbeýde. Sondyqtan qazir bul kompanııanyń ıesi boıynsha qandaı shara qabyldanady degen suraq qoıyldy. О́tken qaıǵyly oqıǵalar boıynsha tergeý jumystary aıaqtalý ústinde. Qyrkúıek aıynda materıaldar sotqa jiberilip, kináliler, onyń ishinde kompanııanyń top-menedjmenti jaýapqa tartylady dep kútilýde. Munyń sońyna jetetinimiz anyq», dedi Premer-mınıstr.
Kezdesý barysynda qaza tapqandardyń barlyǵynyń otbasyna memleket pen jumys berýshi qajetti qoldaý kórsetetini atap ótildi. Atap aıtqanda, respýblıkalyq bıýdjetten asyraýshysynan aıyrylý jaǵdaıy boıynsha beriletin járdemaqy jáne Memlekettik áleýmettik saqtandyrý qorynan áleýmettik tólem qarastyrylǵan.
Sonymen qatar qaza tapqandardyń otbasyna jumys berýshi kenshilerdiń jyldyq jalaqysynyń 10 eselengen mólsherinde moraldyq zııan úshin birjolǵy ótemaqy tólep, sondaı-aq jerleý jáne eske alý sharalaryn ótkizý shyǵyndaryn óteıtin bolady.
Turǵyn úı bolmaǵan jaǵdaıda Qaraǵandy oblysynda páter beriledi, sondaı-aq balalardy joǵary oqý ornynda tegin oqytý qamtamasyz etiledi. Sonymen qatar kompanııa otbasy múshelerin jumysqa ornalastyrý jáne ıpotekalyq nesıelerdi óteý boıynsha sharalar qabyldaıdy.
Osy mindettemelerdiń barlyǵyn oryndaý «ArselorMıttal Temirtaý» AQ menshik ıesi aýysqan jaǵdaıda da jalǵasatyny belgilendi.
Premer-mınıstr atap ótkendeı, qazirgi ýaqytta «ArselorMıttal Temirtaýda» halyqaralyq kompanııalardy tarta otyryp, ekologııalyq aýdıt jáne ónerkásiptik qaýipsizdik aýdıti aıaqtalýda. Olar qyrkúıek aıynda aıaqtalady dep kútilýde, nátıjesinde tıisti sheshimder qabyldanady.
Kezdesý barysynda kenshiler úshin zeınetkerlik jasty tómendetý máselesi kóterildi. Álıhan Smaıylov qazirgi ýaqytta shahterlerge erterek – 55 jastan bastap zeınetke shyǵýǵa múmkindik beretin zańnamalyq ózgerister engizilip jatqanyn aıtty.
Sondaı-aq Premer-mınıstr Qaraǵandydaǵy professor H.J. Maqajanov atyndaǵy kópsalaly aýrýhanasyndaǵy zardap shekken kenshilerge bardy.
Kásiporyn shahterlerge eńbekke jaramsyzdyq kezeńinde ortasha eńbekaqynyń 100% mólsherinde tólem júrgizetini, dárilik zattardy tóleıtini, sanatorıı-kýrorttyq em beriletini jáne moraldyq zııan óteletini atap ótildi.
«Tezirek saýyǵyp, otbasylaryńyzǵa oralyńyzdar», dedi Álıhan Smaıylov.
