Foto: Úkimettiń baspasóz qyzmeti
Kezdesýdiń basynda sóz alǵan Álıhan Smaıylov Úkimet jumysy damyǵan kásipkerlikke negizdelgen ártaraptandyrylǵan ekonomıka qurýǵa baǵyttalǵanyn atap ótti. Onyń ishinde orta bıznes negizgi lokomotıvterdiń biri bolmaq.
«Ońtústik óńirlerdegi iskerlik belsendilik aıtarlyqtaı joǵary, al keıbir kórsetkishter boıynsha olar kósh bastap tur. Bul oblystarda dástúrli túrde aýyl sharýashylyǵy, azyq-túlik jáne jeńil ónerkásiptegi óndiris, sondaı-aq saýda-sattyq damyǵan», dedi Úkimet basshysy.
Premer-mınıstr 7 aıdyń qorytyndysy boıynsha tórt oblystyń barlyǵynda da oń damý dınamıkasy bar ekenin atap ótti. Atap aıtqanda, óńdeý ónerkásibi men agroóndiris kesheninde óndiris ulǵaıyp, qurylys jumystary men negizgi kapıtalǵa tartylǵan ınvestısııalar kólemi artty.
Kezdesý aıasynda orta bıznestiń jumys istep turǵan jobalary men jańa kásiporyndardy iske qosý boıynsha josparlary tanystyryldy. Olardyń qatarynda Almaty oblysynda volfram kenin óńdeıtin taý-ken baıytý kombınaty men iri kólik-logıstıkalyq ortalyq, Jetisý oblysynda Qazaqstandaǵy alǵashqy tolyq sıkldy ındýstrııalyq akkýmýlıatorlyq batareıalardy óndiretin zaýyt, Jambyl oblysynda jańa sút fabrıkasy jáne taǵy basqalarynyń qurylysy bar.
Kezdesý barysynda kásipkerler nesıeleý men sýbsıdııalaýdyń qoljetimdiligin arttyrý, jetispeıtin temirjol jáne kólik joldaryn salý, aýyl sharýashylyǵy kooperasııasyn damytý, ekologııalyq zańnama normalaryn saqtaý jáne iri saýda jelilerine birdeı qoljetimdilikti qamtamasyz etý máselelerin kóterdi.
Metallýrgııa, et jáne sút óndiretin mal sharýashylyǵy, qus jáne maqta sharýashylyqtaryn qoldaý, sondaı-aq «Qorǵas – Shyǵys qaqpasy» arnaıy ekonomıkalyq aımaǵynyń tıimdiligin arttyrý boıynsha naqty usynystar aıtyldy.
Ár másele boıynsha ortalyq memlekettik organdar men atalǵan óńirler ákimdikteriniń basshylary tolyq túsinikteme berdi.
Premer-mınıstr atap ótkendeı, kásipkerlerdi jan-jaqty qoldaý – Úkimet jumysynyń mańyzdy bóligi. О́tken jyldyń qorytyndysy boıynsha respýblıkada shaǵyn jáne orta bıznes nysandarynyń sany 27%-ǵa, al osy salada jumyspen qamtylǵandar sany 18%-ǵa ósip, 4,1 mln adamǵa jetken. Jalpy eldiń JIО́-sindegi ShOB úlesi 36,5%-ǵa deıin ósti.
«Bul kásipkerlerdiń problemalyq máselelerin tyńdap, olardy birtindep sheshý boıynsha kúndelikti birlesken jumystyń nátıjesi. Osy oraıda qalǵan bızneske qoıylatyn artyq talaptardy joıý onyń damýyna qosymsha serpin bermek», dedi Álıhan Smaıylov.
Úkimet basshysy búgingi tańda Qazaqstan ekonomıkasynyń ósýi 4,8%-ǵa deıin jedeldegenin, bul jaqsy kórsetkish ekenin aıtty. Sonymen qatar Úkimet tıisti damý baǵdarlamalaryn iske asyrýdy jalǵastyrýda.
«Bizdiń maqsatymyz – ekonomıkalyq ósimdi 7-den 10%-ǵa deıin arttyrý, biraq bul úshin bankter qoljetimdi nesıeler berip, kásipkerler kóterip otyrǵan ózekti máselelerdi sheshý qajet. Osy máselelerdiń barlyǵy boıynsha jumys istep jatyrmyz», dedi Premer-mınıstr.
Sonymen birge Úkimet basshysy qazirgi ýaqytta «Atameken» ulttyq palatasymen ózara is-qımyl jasaı otyryp, bıznes úshin qolaıly jaǵdaılar jasaý boıynsha júıeli sharalar qabyldanyp jatqanyn atap ótti. Atap aıtqanda, bul artyq talaptardy jáne ákimshilik júktemeni azaıtýǵa, memlekettik baqylaý jáne qadaǵalaý rásimderin avtomattandyrýǵa, salyqtyq ákimshilendirýdi jeńildetýge jáne sıfrlandyrýǵa, memlekettik satyp alýǵa jáne taǵy basqalarǵa qatysty.
Qorytyndylaı kele, Álıhan Smaıylov Úkimet Apparaty, ortalyq memlekettik organdar men óńirler ákimdikterinen kezdesý barysynda kóterilgen máseleler men usynystardy tıisti dárejede pysyqtap, sondaı-aq orta bıznespen ótken kezdesýler barysynda aıtylǵan máselelerdiń sheshilýine monıtorıng júrgizýdi talap etti.
