Sýretti túsirgen Erlan OMAR, «EQ»
Qazirgi tańda ıslam ǵylymy ár baǵytta zerttelip, oǵan bilikti ǵalymdarymyzdan bastap elshil azamattarǵa deıin úles qosyp keledi. Solardyń biri – Qazaqstan Jýrnalıster odaǵynyń múshesi, ólketanýshy Narbaı Taǵaıuly. Jaqynda ǵalymnyń «Islamdaǵy rýhanı jańǵyrý», «Taqýalyqqa bastar jol», «Qurandaǵy qııamet pen qııaldaǵy qııamet», «Biz taqýalyq mektebindemiz, biraq jaqsy oqýshy emespiz», «О́mir ónegesi nemese siz izdegen kitap» syndy bes kitaptan turatyn jınaǵy kóziqaraqty oqyrmanǵa jol tartty. Avtor kitapta ıslam dinin el ádebıeti muralary men ulttyq tanym arqyly túsindirip, maǵynasyn ashýǵa umtylady. Ultymyzdyń rýhanı saýlyǵy úshin dinı bilim nári baǵaly qundylyq ekenin baıan etedi.
– Meniń maqsatym – jalǵanda jańylys baspaı, týralyqpen jasaǵysy keletinderge keńes berip, demeý. Bizdiki aıat-hadısti qurmettegenderdiń, ulttyq salt-dástúrdi syılaǵandardyń ónegeli ómirin nasıhattaý, pendelerdiń ómirdegi kemshilikterinen pikir túıý. Adamdarǵa qaıyr jasaý – elge qaıyr jasaý. Bul ultymyzdyń kemin toltyrý, azyn kóbeıtý, kúshin arttyrý, jamanyn jaqsartý. Bizge eń qajeti – tildegi emes, júrektegi shynaıy ımandylyq, – deıdi avtor.
Hamsa-jınaqtaǵy din men ulttyq em-dom, din men beıneleý óneri, sondaı-aq atadan balaǵa jetken maqal-mátelderimizdiń ımandylyq negizderi baıypty túsindiriledi. Baıyrǵy Buqara aımaǵyn jaılaǵan qazaqtardyń etnografııasy men tanym-túsiniginen maǵlumat beretin edáýir tarıhı-turmystyq materıaldar da kórinis tapqan.
