Memleket basshysy atap ótkendeı, halyqaralyq qaýipsizdiktiń jańa júıesin qalyptastyrý úshin beıbitshilikke shaqyratyn jańa jahandyq qozǵalys qajet. Bul rette rýhanı jáne dinı kóshbasshylardyń róli zor.
Qazirgi tańda álem halqynyń shamamen 85 paıyzy ózin belgili bir dinmen baılanystyrady. Sondyqtan din kóshbasshylary halyqaralyq úderisterge aıtarlyqtaı yqpalyn eskere otyryp, jahan jurtyn alańdatqan ózekti problemalardy sheshýde mańyzdy ról atqarýy kerek.
Jalpy, álemdik dinder adam ómiriniń qundylyǵy, meıirimdilik, ózara jaýapkershilik pen qoldaý, zorlyq-zombylyq pen arazdyqqa qarsy turý sııaqty negizgi qaǵıdalardy dáripteıdi. Prezıdentimizdiń maqalasynda aıtylǵandaı, dál osy qaǵıdalar jańa álemdik júıege negiz bola alady.
Din qaıratkerleri qaqtyǵystardy azaıtýǵa, qazir álemde keń taralǵan jek kórý men dushpandyq ıdeologııasynyń aldyn alýǵa da yqpal ete alatyny anyq. Sonymen qatar maqalada tehnologııalyq damýdyń moraldyq jáne adamgershilik jaǵy týraly mańyzdy oılar aıtylady. Shyn máninde, sıfrlyq jáne tehnologııalyq damý gýmanızm men etıkaǵa taban tiremese, onyń qarama-qaıshy saldary bolýy ábden múmkin. Sondyqtan bul rette de rýhanı kóshbasshylardyń baǵyt-baǵdary qajet.
Elimizde Álemdik jáne dástúrli dinder lıderleriniń sezi 20 jyl boıy turaqty túrde ótkizilip kele jatqany belgili. Qazirgi tańda dúnıejúzinde dinaralyq jáne órkenıetaralyq dıalogti nyǵaıtýda bul bastama mańyzdy ról atqarady.
Sol sebepti, byltyr qyrkúıek aıynda Astanada Prezıdentimiz Qasym-Jomart Toqaevtyń tóraǵalyǵymen ótken VII sezd mańyzdy halyqaralyq oqıǵa retinde qabyldandy. Sezge Rım Papasy Fransısk, Ál-Azhardyń Joǵarǵy ımamy sheıh Ahmed at-Taıeb, Izraıldiń Joǵarǵy ravvınderi jáne álemniń basqa da kóptegen rýhanı jetekshileri qatysty.
Forýmǵa qatysýshylar eki kún boıy adamzattyń jahandyq problemalaryn sheshý jolynda dinderdiń jasampaz áleýetin paıdalaný máselesin talqylady. Sondaı-aq jalpyadamzattyq jáne rýhanı qundylyqtarǵa negizdelgen jańa álemdik júıeniń bederi belgilendi. Sezd barysynda aıtylǵan barlyq negizgi ıdeıalar men usynystar forýmnyń qorytyndy Deklarasııasyna engizildi.
Kelesi aıda Astanada Sezd Hatshylyǵynyń otyrysy ótedi. Onda VII sezdiń ıdeıalary men qorytyndy qujatyn dáripteý máseleleri jáne aldaǵy on jylǵa arnalǵan Dinaralyq forýmdy damytý tujyrymdamasy qaralady.
Otyrys kezinde álemdik dinderdiń ókilderi el Prezıdentiniń maqalasynda kóterilgen mańyzdy máselelerdi de talqylaıtyny sózsiz.
Jalpy, ýaqyt ótken saıyn dinaralyq dıalog pen jalpyadamzattyq qundylyqtardy dáripteýde elimizdiń biregeı róliniń mańyzy artyp keledi. Osylaısha, Qazaqstan halyqaralyq qoǵamdastyqtyń aldynda turǵan qazirgi kúrdeli problemalar men syn-qaterlerdi eńserýge óziniń eleýli úlesin qosyp otyr.
Máýlen ÁShIMBAEV,
Parlament Senatynyń tóraǵasy – Álemdik jáne dástúrli dinder lıderleri sezi Hatshylyǵynyń basshysy
