Kollajdy jasaǵan – Qonysbaı ShEJIMBAI, «EQ»
Oblystyq polısııa departamenti patrýldik polısııa rotasynyń komandıri, polısııa kapıtany Ádilbek Shahmetovtiń aıtýynsha, jol-kólik oqıǵalaryna áser etetin birneshe sebep bar. Birinshiden, júrgizýshiler men jaıaý júrginshilerdiń deni jol qozǵalysy erejelerin saqtamaıdy. Ekinshiden, júrgizýshiler de, jaıaý júrginshiler de qyraǵylyq pen saqtyqqa mán bermeıdi. Úshinshiden, júrgizýshiler jyldamdyqty shamadan tys asyrady. Tórtinshiden, basyp ozý erejesin óreskel buzady. Osyndaı sebepterdiń saldarynan adam ólimine uryndyrar jol-kólik oqıǵalarynyń sany azaımaı tur.
«Jyl basynan beri tasjoldarda jyldamdyq rejimin saqtamaǵan 14 051 kólik júrgizýshisi anyqtaldy. Al 521 júrgizýshi aldyndaǵy kólikti basyp ozý qaǵıdasyn buzǵan. Patrýldik polısııa rotasynyń qyzmetkerleri oblystyq, respýblıkalyq mańyzy bar tasjoldarda kólik qozǵalysyn udaıy qadaǵalaǵanyna qaramastan júrgizýshiler tarapynan osyndaı quqyq buzýshylyq tirkelip otyr. Sol sebepten, kólik júrgizýshileri men jaıaý júrginshilerge jolda júrý erejesin qatań saqtaýdy eskertip kelemiz. О́ıtkeni jol erejesin saqtaý – dittegen jerge aman jetýdiń kepili», deıdi Ádilbek Shahmetov.
Basyp ozý erejesin órsekel buzatyndar qatarynda sheteldik júrgizýshiler de bar. Sondaı júrgizýshiniń biri – О́zbekstan Respýblıkasynyń azamaty.
«Biz «Belsendi azamattar 06» Telegram chatyn qurǵan edik. Osy chatqa respýblıkalyq mańyzdaǵy «Dossor-Qulsary-Beıneý» tasjolynda basyp ozý erejesin óreskel buzý deregine qatysty vıdeo-aqparat tústi. Polısııa qyzmetkerleri sol aqparatta kórsetilgen «Chevrolet» avtokóligin toqtatty. Tekserý kezinde 1997 jylǵy shetel azamatynyń 2020 jyly sot sheshimimen kólik quralyn basqarý quqyǵynan aıyrylǵan. Alaıda ol 2021 jyly О́zbekstan Respýblıkasynan jalǵan júrgizý kýáligin jasatyp, kólik rýline zańsyz otyrǵany anyqtaldy», dep málim etti Á.Shahmetov.
Jolda júrý erejesin buzǵanymen qoımaı, aıyppulyn tóleýge mán bermeıtin júrgizýshiler de bar. Atyraý qalalyq polısııa basqarmasy patrýldik polısııa batalonynyń komandıri, polısııa maıory Dáýren Násıpollanyń aıtýynsha, «Qorǵaý – qaýipti júrgizýshi», «Sergek» aqparattyq júıesiniń kómegimen qyrkúıekte 490 ákimshilik quqyq buzý deregi tirkelgen.
«Qyrkúıek aıynda aıyppulyn tólemegen 1 092 avtokóliktiń júrgizýshisi anyqtaldy. Onyń ishinde 131 kólik aıyppul óndirilgenge deıin arnaýly turaqqa qoıyldy. Al 900-ge jýyq kólik júrgizýshisi aıyppulyn ustalǵan jerde jedel tóledi. Jedel basqarý ortalyǵynyń beınebaqylaý qyzmetkerleri keshki saǵat 18:30 shamasynda «Interceptor» izdeý júıesi arqyly «Hyundai» avtokóligin anyqtady. Bul kólik Grýzııa Respýblıkasynda tirkelgen. Polısııa qyzmetkerleri tekserý kezinde kólik júrgizýshisiniń 330 myń teńgeden asatyn 20 aıyppuly bar ekeni anyqtaldy. Kólik júrgizýshisine qatysty Ákimshilik quqyq buzý kodeksiniń 785-babyna sáıkes hattama toltyryldy», deıdi Dáýren Násıpolla.
Oblystyq polısııa departamenti patrýldik polısııa rotasynyń komandıri, polısııa kapıtany Ádilbek Shahmetovtiń deregine súıensek, jol boıynda júrgen tórt túliktiń kesirinen toǵyz aıda 111 jol-kólik oqıǵasy tirkelgen. Sondaı jol-kólik oqıǵasynyń biri 11 qazanda túngi saǵat 23:50 shamasynda «Aqtóbe-Atyraý-Astrahan» tasjolynyń 577-shaqyrymy tusynda bolǵan. Jylqyny qaqqan «Lada Largus» avtokóliginiń júrgizýshisi men jolaýshysy ártúrli dene jaraqatymen oblystyq aýrýhanaǵa jetkizildi.
Osyndaı taǵy bir oqıǵa 14 qazanda tirkelip otyr. Jergilikti ýaqytpen saǵat tańǵy 06:45 shamasynda respýblıkalyq mańyzy bar «Aqtóbe-Atyraý-Astrahan» tasjolynyń 352-shaqyrymy tusynda «Toyota Ipsum» avtokóligi 15 qoıdy qaǵyp ketken. Tekserý kezinde 1969 jylǵy er adamnyń ıeligindegi qoıyn tasjoldan ótkizbek bolǵany anyqtaldy. Soǵan baılanysty mal ıesine qatysty Ákimshilik quqyq buzýshylyq týraly kodeksiniń 408-babymen hattama toltyrylyp, ákimshilik jaýapqa tartyldy.
«Toyota Ipsum» avtokóligi Qyzylqoǵa aýdanynyń ortalyǵy – Mııaly aýylynan Atyraý qalasyna baǵyt alǵan. Aýdandyq polısııa bóliminiń patrýldik polısııa qyzmetkerleri kólik júrgizýshisine Mııaly aýylynan shyǵar kezde jol qozǵalysy erejesin qatań saqtaý qajettigin eskertken eken. Alaıda kólik júrgizýshisi polısııa qyzmetkerleriniń eskertýin elemegenge uqsaıdy.
«Úı janýarlarynyń kesirinen tirkeletin jol-kólik oqıǵalarynyń basym bóligi túngi mezgilde bolady. Sebebi túnde avtokólik júrgizýshileri alys jaryq faryn ózine qarsy júrip kele jatqan avtokólik ábden jaqyndaǵansha óshirmeıdi. Sonyń saldarynan júrgizýshiniń kózi farǵa shaǵylysyp, jol ústinen ótken maldy kórmeı, soqtyǵysyp jatady. Eger mal ótýge arnalǵan belgisi ornatylǵan aýmaqta baqtashy bolǵan kezde úı janýaryn qaǵatyn bolsa, onda kiná júrgizýshige artylady. Joldyń mal aıdaýǵa arnalǵan belgisi joq tusynda jáne baqtashy bolmaǵan jaǵdaıda jaýapkershilik úı janýarynyń ıesine júkteledi. Jyl basynan beri Ákimshilik quqyq buzýshylyq kodeksiniń 408-babymen (Aýyl sharýashylyǵy janýarlaryn jaıý qaǵıdalaryn buzý) 583 adam jaýapkershilikke tartyldy», dedi Ádilbek Shahmetov.
Atyraý oblysy
