Foto: ashyq derekkóz
Depýtattyń sózinshe, lýdomanııa – elimizdegi eń úlken máselelerdiń biri, buny qanshama hattar jáne halyqpen kezdesýler rastaı túsedi. О́kinishke qaraı, dúnıejúzi boıynsha lýdomanııaǵa baılanysty Qazaqstan eń belsendilerdiń qatarynda tur.
«157 myń quqyq buzýshylyqtyń 31 myńy qumar oıyndary kesirinen jasalǵan. Al ajyrasýdyń 40 paıyzy lýdomanııadan bolǵan. О́z-ózine qol jumsaýdyń basty sebebi - asyra úlken qaryz jáne nesıe. Prokýratýradan alynǵan resmı málimet boıynsha byltyr 3 676 sýısıdtiń árbir besinshisi qumar oıyndaryna qatysty bolǵan. Biraq biz ishki ister mınıstrligimen de sóılestik, kórsetkish 50 paıyzǵa deıin barady», dedi Rýslan Berdenov.
Onyń aıtýynsha, elimizdegi jalpy 3 mln 500 myń er balanyń 700 myńnan astamy bir ret bolsyn bás tikken, ıaǵnı, qalaı oınaýdy biledi, lýdomanııamen tanys degen sóz. Bul 1 mln-nan astam qumarpazdar sany odan ári ósetinin bildiredi.
Májilistiń Qarjy jáne bıýdjet komıtetiniń múshesi R. Berdenovtiń aıtýyna qaraǵanda, onyń áriptesteri aıtyp júrgen 350 myń lýdoman bar degen eski kórsetkish qazirgi tańda 1 mln-ǵa jetken. Taǵy bir alańdatarlyǵy - 2017 jyldan bastap býkmekerlik bıznes aınalymy 15 mlrd bolsa, 2022 jyly 554 mlrd, al 2023 jyly 1 trıllıon teńgege jetpekshi. Aınalym 70 ese ósse de, salyq tóleý mólsheri ózgermeı, sol 2017 jylǵy mólsherde turyp qalǵan. Jaýapty mınıstr onlaın júıesin japsaq, bıýdjetke túsetin salyq azaıyp qalady degen negizdeme aıtady. Negizgi maqsat salyq bolsa, 2017 jyldan beri salyq kóterý máselesi aıtylmaǵan.
«Qaýipsizdik keńesinde Memleket basshysy «oıyn bıznesinde» qarajattyń barlyq qozǵalysyn qadaǵalap, buzýshylyqtar anyqtalǵan kezde qajetti sharalardy qoldaný mańyzdy ekenin erekshe atap ótti. Qajetti sheshim qabyldar aldynda Konstıtýsııamyzdyń birinshi babyna sáıkes, memlekettiń eń qymbat qazynasy adam jáne onyń ómiri degen qaǵıdany qatań ustanýymyz qajet», dep túıindedi Rýslan Berdenov.
