1990 jyly 25 qazanda «Egemendik týraly» deklarasııa qabyldandy, elimiz táýelsizdikke bet burdy, azat bolýdyń alǵysharty jasaldy. Sondyqtan biz úshin bul kúnniń orny erekshe. Osyndaı mańyzdy qujattyń qabyldanýy memleket pen halyqtyń ósip-órkendeýine aıtarlyqtaı áser etti. Elimizdiń damýyn ári qaraı jalǵastyratyn birqatar úrdistiń negizi qalandy. Memlekettiń birtutastyǵy, onyń aýmaǵynyń bólinbeıtindigi men qolsuǵylmaýshylyǵy egemendiktiń negizgi qaǵıdattaryna aınaldy.
Táýelsizdik jyldarynda elimizdiń Áskerı-teńiz kúshteri Qazaqstan Respýblıkasy Qarýly Kúshteriniń derbes túri retinde túpkilikti qalyptasty. Áskerı teńizshilerdiń mindeti – birinshi kezekte Kaspıı teńizindegi Qazaqstannyń egemendigi men memlekettik múddelerin qorǵaý. Áskerı doktrınada aýmaqtyq sýlarda jáne Kaspıı teńizi kontınenttik qaırańynyń Qazaqstan bóliginde memlekettiń ulttyq múddelerin qorǵaý qajettiligi atap ótilgen. Sol sebepti Áskerı-teńiz kúshteri Kaspıı teńiziniń elimizge tıesili akvatorııasynda memlekettiń qolsuǵylmaýshylyǵy men aýmaqtyq tutastyǵyn, egemendigi men ekonomıkalyq múddelerin qorǵaý sııaqty keń aýqymdy mindetterdi abyroımen oryndap keledi.
Otandyq jáne sheteldik zamanaýı kemelermen jaraqtanǵan Áskerı-teńiz kúshteriniń jeke quramy el aýmaǵynda da, odan tys jerlerde de ótkiziletin áskerı oqý-jattyǵýlarǵa turaqty túrde qatysyp turady. Bulardyń bárinde ekıpajdardyń daıarlyq deńgeıi jetildirilip, oqý-jaýyngerlik mindetterdi oryndaý kezinde olardyń ózara is-qımyl jasaý tártibi pysyqtalady. О́tkizilip jatqan oqý-jattyǵýlar elimizdiń Áskerı-teńiz kúshteri alǵa qoıylǵan mindetterdi oryndaýǵa jáne teńizdegi memlekettik múddelerdi qorǵaýǵa daıyn ekendigin kórsetti.
Sáken BEKJANOV,
kontr-admıral, Áskerı-teńiz kúshteriniń bas qolbasshysy
