Eń ǵajaby, shalǵaı eldi meken turǵyndaryn joǵary medısınalyq tehnologııamen qamtamasyz etýdi, ınnovasııalyq medısınalyq kómekti jandandyrýdy maqsat etken qaıyrymdylyq jobasy arqyly berilgen apparattar syrqattyń sebebin, keseldiń ýaqytyn dál anyqtaýǵa múmkindik beredi. Mobıldi ýltradybystyq apparat tósek tartyp qalǵan, úıde, mashınanyń ishinde jatqan naýqastyń hal-jaıyn anyqtaýǵa kómektesedi. Buryn ýltradybystyq apparatqa túsirý úshin naýqasty mindetti túrde aýrýhanaǵa aparatyn. О́ńir ákiminiń baspasóz qyzmetiniń málimetinshe, qaıyrymdylyq aksııasynyń bastamashylary – «Philips Foundation» halyqaralyq kommersııalyq emes uıymy men «Sábı» qory. Sonymen qatar dárigerlerdi ınnovasııalyq jabdyqtarmen jumys isteýge úıretetin úsh kúndik oqytý uıymdastyryldy.
Qaıyrymdylyq bastamasyn júzege asyrý úshin mobıldi qosymshanyń negizinde jumys isteıtin jáne planshetke nemese smartfonǵa qosylǵan datchıkter jıyntyǵy – portatıvti ýltradybystyq júıe tańdaldy. Bul ınnovasııalyq sheshim stasıonarlyq ýltradybystyq jabdyqty paıdalaný múmkindigi bolmaǵan klınıkalyq jaǵdaılarda pasıentterdiń hálin jedel ýltradybystyq jaǵynan baǵalaý úshin arnaıy ázirlengen. Bul, eń aldymen, emdeý mekemeleriniń qabyrǵasynan tys jerde, ıaǵnı oqıǵa ornyndaǵy qıyn jaǵdaılarda medısınalyq kómek kórsetý kezinde qoldanylady. Bul rette naýqastyń tóseginde, úıde, jedel járdem kóliginde jáne tótenshe jaǵdaılarda kómek kórsetilýi múmkin.
Dárigerler qaıyrymdylyq jobasy aıasynda joǵary tehnologııalyq medısınalyq jabdyqty paıdalaný jónindegi trenıngterden ótti. Munan soń ony klınıkalyq tájirıbesinde júrek-qan tamyrlary aýrýlary bar, ish qurylysynyń syrqaty bar, ókpe aýrýlary bar naýqastarǵa kómek kórsetý úshin, akýsherlik-gınekologııalyq zertteýler júrgizý úshin jáne operasııa bólmesinde, reanımasııa bóliminde jáne qarqyndy terapııada klınıkalyq kúrdeli pasıenttermen jumys isteýde qoldanady.
– Biz ınnovasııalar men áleýmettik mańyzdy bastamalardy toǵystyrý adamdardyń ómir súrý sapasyn arttyrýǵa yqpal etetinine senemiz. Dárigerlerdiń qoldanylýyna berilgen zamanaýı portatıvti ýltradybystyq jabdyq tipti medısınalyq uıymdardan tys jerlerde de aýyr jaǵdaıdaǵy pasıentterdiń jaǵdaıyn jedel ýltradybystyq baǵalaýǵa múmkindik beredi. Dáriger-klınısısterdiń qolyndaǵy «Qaltaly «ýltradybys», bul medısınalyq kómek kórsetýdiń jańa halyqaralyq standarttary sanalady, – dedi Ortalyq Azııa, Kavkaz jáne Mońǵolııa aımaǵyndaǵy «Philips Healthcare» kompanııasynyń óńirlik dırektory Olga Volkova.
О́z kezeginde «Sábı» qaıyrymdylyq qorynyń prezıdenti Ásel Tasmaǵambetova:
– «Sábı» qory óziniń otandyq aýrýhanalardy ınnovasııalyq jabdyqtarmen jaraqtandyrý baǵytyndaǵy medısınalyq baǵdarlamasynyń maqsattaryna tolyq sáıkes keletin osyndaı mańyzdy jobaǵa qoldaý kórsetti. Portatıvti ýltradybystyq júıelerdiń kómegimen Jetisý jáne Almaty oblystarynyń dárigerleri árbir dıagnozǵa senimdi bolýy úshin naqty vızýalızasııa júrgize alady. Ýaqtyly dıagnoz qoıý – tıimdi emdeýdiń kilti, – dedi.
Atap ótsek, qaıyrymdylyq jobasynyń bastamashylary bul is-sharanyń maqsaty shalǵaıdaǵy jáne jetýi qıyn óńirlerdegi pasıentterge joǵary tehnologııalyq medısınalyq kómektiń qoljetimdiligin arttyrý ekenin basa aıtady. Osy bastamanyń kómegimen Jetisý men Almaty oblysynyń 7 aýrýhanasy 18 zamanaýı medısınalyq qural-jabdyqqa qol jetkizdi, al 30 dáriger oqýyn jalǵastyryp jatyr.
Jalpy, 9 mobıldi ýltradybystyq júıe Alakól, Panfılov aýdandarynyń aýdandyq aýrýhanalaryna – 2-den, Tekeli qalasynda – 3, sondaı-aq Taldyqorǵan qalalyq jedel járdem stansasyna 2 jabdyq beriledi. Osy medısınalyq mekemelerdiń 11 dárigeri oqytýdan ótedi.
Jetisý oblysy
