S.Táshimovanyń týyndylary Qazaqstan, AQSh, Germanııa, Reseı jáne Jańa Zelandııanyń jeke kolleksııalarynda saqtalǵan. Saltanat model jáne aktrısa retinde de kópshilikke tanymal. Kórmede portretter, natıýrmorttar, qala kórinisteri men sýretshiniń jartylaı abstraktili keskindeme stılinde oryndaǵan ózge de kartınalary kópshilik nazaryna usynyldy. О́z shyǵarmalarynda tabıǵattyń tereń qupııasyn ashýǵa talpynatyn sýretshi oı men sezimniń keń spektrin jetkizetin kúrdeli tús kompozısııalaryn beıneleıdi. Saltanat «Dárýish bıi», «Sazsyrnaı úni», «Azııa ıirimderi» atty týyndylarynda dala saryndaryn sıqyrly boıaý tústerimen názik úndestiredi. Qorshaǵan ortamen tyǵyz birlikte ómir súrgen ata-baba dúnıetanymynyń qaınar kózi tabıǵatpen baılanysty qalyptasqany belgili. Uly jaratýshyny «Táńiri» dep tanyp, tabıǵatty onyń tamasha týyndysy dep túsingen qazaq halqy tabıǵatty aıalaý arqyly oǵan úlken qurmet kórsetken. Sondyqtan da tabıǵatqa baılanysty qalyptasqan úrdisterdiń búgingi kúnge deıin saqtalyp, salt-dástúrimiz ben mádenıetimizde kórinis taýyp jatatyny zańdy qubylys.
Kórme jetekshisi G.Jubanovanyń sýretshi shyǵarmalaryna jasaǵan taldaýy tym tereń. О́ner zertteýshisiniń aıtýynsha, Saltanat Táshimovany sýretshi retinde ómirdiń fılosofııalyq ónegesi men qorshaǵan orta kóbirek tolǵandyrady. Osy taqyryp sýretshiniń «Rýhtyń samaly», «Álemniń toǵysýy», «Aıdyń qarsy beti», «Álemderdiń týylýy» atty eńbekterinde tek kúshti men álsizdiń ǵana emes, jan men tánniń de tańdaý bostandyǵy jolyndaǵy kúresi sýretteledi. Olar anyq beınelenbegen – qarapaıym syzyqtardan quralǵan, alýan tústerdiń astasýymen keskindelgen. Polotnolardaǵy pishinniń mańyzyn joqqa shyǵara otyryp, ony qııal áleminen bosatyp, boıaýlar gammasy býyrqanǵan jazıra jazyqtarǵa qaraı jeteleıdi. Jyldam oılaý, túısiktegi dybysty kenepke sıqyrly boıaýlarmen qubyltyp jazý S.Táshimovanyń shyǵarmashylyǵyna tán. Onyń basty ıdeıasy – erkindik, shyǵarmashylyq múmkindigin tolyq ashý, dúnıe keńistigin tanyp-bilýdiń jańa formalary men tanym kategorııalaryn izdeý. Adam tabıǵatynyń ózgermeıtin, turaqty ári árqıly bastaýyna baǵyttap otyratyn mıfologııalyq saryn onyń qylqalamyna baılaýly. S.Táshimovanyń júrek tuńǵıyǵynan shyqqan jarqyn da jyly, shattyqqa toly kórkem álemi sýretker men onyń shyǵarmalaryna úńilgen adam arasyn tutastyryp jiberedi. Sýretshiniń tosyn pishinderi men tyń boıaýlarmen baılanysqan kompozısııalary, tabıǵat jaratylysynyń úılesimdiligi men ásemdigin aıqyndap, qazirgi kúrdeli kezeńniń qaıǵy-muńyna qarsy turady.
ALMATY
