– Bıyl Ballet Globe halyqaralyq bı festıvali tujyrymdamasyn ózgertip, qala turǵyndary men balet ónerin súıetin qaýymnyń nazaryn Kontemporı stıline aýdarýdy uıǵardy. Bul Eýropa, Amerıka men Azııada qarqyndy damyp kele jatqan belgili bı ındýstrııasy. Osy festıvalda álemdik sahnanyń eń ǵajaıyp qoıylymdaryn bı sańlaqtarynyń óz oryndaýynda usyndyq. Ballet Globe festıvaliniń biregeıligi – kórermenge bıdiń klassıkalyq túrlerin rahattana otyryp tamashalaýdy ǵana emes, sonymen birge, oryndaýshylyq ónerdi qabyldaýdyń jańa kókjıekterin ashyp, sanany keńeıtýdi usynady. Aıtpaǵym, sahnadaǵy kórinisti tamashalaǵan adam oıǵa shomyp, bálkim, ózin mazalaǵan suraqtyń jaýabyn tapqan shyǵar. Zamanaýı bı óneriniń maqsaty da osy, – dedi Ballet Globe kompanııasynyń uıymdastyrýshysy ári joba avtory Erlan Andaǵulov.
Maýsym saıyn balet álemindegi aty ańyzǵa aınalǵan dúldúldermen tanystyratyn festıvalǵa Ulybrıtanııa, Nıderland, Shveısarııa, AQSh, Qazaqstan horeograftarynyń 20 úzdik qoıylymy men zamanaýı bı óneriniń 12 juldyzy qatysty. Jahandyq balet ónerinde biregeı bıshi sanalatyn Nıderland bı teatrynyń jetekshi ártisteri Hloıa Albaret, Rodjer Van der Poel jáne Olıve Koffard pen Pıter Chýdyń, Koroldik balettiń talantty bıshileri Morgan Kapelları, Klaýdıo Kanıalozı oryndaýyndaǵy jańa qoıylymnyń premerasy – bıylǵy festıvaldyń basty jańalyǵy. Al Jenevadaǵy Úlken teatr sahnasynyń eń jarqyn ókilderi Sasha Rıva men Sımone Repele, japon bıshisi Iýmı Aızava Almatyǵa osymen ekinshi ret kelip otyr.
Astana Opera teatrynyń solısi Sultanbek Ǵumardyń oryndaýyndaǵy Patrık de Bana horegorafııasymen «Turan» etno-folklorlyq ansambliniń mýzykasyna negizdelgen «Qıly zaman» kórinisi zamanaýı bı jaýharlarymen teń túspese, kem túspeıtin órnegimen sahna saltanatyn bıiktete tústi. Kesh baǵdarlamasynda Frans Shýberttiń «Jeune Fille et Morts» mýzykasyna, Gavın Braıerstiń «Sinking», kompozıtor jáne pıanıst Esıo Bossonyń «What If», Armand Amardyń «Playground», Andre Barrostyń «Conscious Shift» shyǵarmasyna negizdelgen qoıylymdardy almatylyq kórermen jyly qabyldady. Horeograftar ár týyndynyń ózegin búgingi kúnniń oqıǵasymen, mán-mazmunymen toltyrǵan, sondyqtan bolar, bı ısharasyn kórermen jaqsy túsindi. Bıshilerdiń júreginde ot janyp turǵandaı, sol ottyń jalynymen kórermendi jylytqysy kelgendeı, tilmen aıtyp jetkize almaıtyn sezimdi deneniń qozǵalysymen, tánniń tuspalymen baıandady. «Shyǵarmada ıdeıa men kórermen arasynda kózge kórinbeıtin, tek janmen sezinetin baılanys ornaıdy. Kontemporı stıli kórermenmen onyń tilinde sóılesedi. Árkim óziniń hıkaıasyn, basynan ótkenin, sezimin, muńyn kóredi, óz basyndaǵy jaǵdaıdy jańa qyrynan baǵalap, oı tolǵaýyna jol ashady. Kórermen sahnada kórgenin, óz-ózine kózqarasyn, ómirmen qarym-qatynasyn taldaıdy, bul ózin tereńnen tanyp bilýge, túsinýge, ózin qurmetteýge yqpal etedi», deıdi Hloıa Albaret.
Balet festıvali tamasha tosynsyımen túıindeldi. Sahnada DJ Dianella óner kórsetip, lazer shoýy qoıyldy. Almaty kórermenderi bir sahnada samsap kóringen álemniń áıgili ártisteriniń sıqyrly ónerine arbalǵandaı, lázzatqa toly sezimin qol soǵýmen, kemerinen asyp býyrqanǵan kóńil kúıin «bravo» degen iltıpatpen bildirip, talaıǵa deıin tapjylmaı turyp aldy.
ALMATY
