2011 jyly polshalyq ınvestordyń kelýimen zaýyt qaıta túledi. Investısııalyq joba iske asyrylyp, qondyrǵylar jańǵyrtýdan ótti. Jańa óndiristik jeliler iske qosyldy. Investor zaýytty aıaǵyna turǵyzý úshin 108 mln dollar ınvestısııa quıǵan. Údemeli-ındýstrııaldy ınnovasııalyq damý baǵdarlamasymen qatty tabletka, ampýla, untaq túrinde dári shyǵaratyn jańa óndiristik keshen salyndy. Zaýytqa Italııa, Germanııa, Ońtústik Koreıa elderiniń zamanaýı ozyq tehnologııalary ornatyldy. «Hımfarm» kompanııasy Qazaqstandaǵy eń ozyq ǵylymı-zertteý ortalyǵyna ıe. Bul kásiporynǵa jańa dárilerdi oılap tabýǵa múmkindik beredi. Sondyqtan Santo dárilik preparattardy ózi jasap, saýdaǵa qoıyp, Qazaqstan men Orta Azııaǵa qoljetimdi baǵada eksporttaıdy.
Kompanııanyń óndirisi jyl saıyn 708 mln tabletka, 255 mln kapsýla, 46,7 mln sefalosporın, 15,5 mln mısına tobyndaǵy antıbıotık qutylaryn, 8,4 mln qutydaǵy sterıldi emes suıyq dárilerdi shyǵarýǵa qýatty. «Hımfarm» – ártúrli aýrýǵa arnalǵan 250-den asa dári túrin óndiretin Qazaqstandaǵy eń úlken farmokologııalyq kompanııa. Kásiporyn naryq suranysyna qaraı jyl saıyn dári túrlerin kóbeıtip keledi. Dárilik preparattarynyń basym bóligin ıneksııalyq, ınfýzıondy eritindiler men tabletkalar quraıdy. Santo tek Qazaqstan naryǵyn qamtamasyz etip qana qoımaı, Reseı men Mońǵolııa elderine ónimderin jóneltedi. Qyrǵyzstan men О́zbekstanda kompanııanyń ókildikteri jumys isteıdi. Kompanııada ártúrli antıbıotık shyǵarýǵa, dárilik zattardy saqtaýǵa ruqsat beretin halyqaralyq GMP, GDP sertıfıkattary bar.
2019 jyly Polfarma toby kompanııasy Eýrazııalyq ekonomıkalyq odaq sheńberinde maquldanǵan dáriler tizbeginiń qataryna endi. Santo qyzmetkerleriniń kásibı biliktiligin arttyrýǵa kóp kóńil bóledi. Máselen, kompanııa Santo academy onlaın-tuǵyrnamasyn iske qosty. Sol arqyly úsh eldiń farmologteri onlaın-tuǵyrnamaǵa kirip, qajetti deńgeıde bilim ala alady. Kompanııa qyzmetkerlerine ınternet ónimniń mobıldi qosymshasy da qarastyrylǵan. 2021 jyldan bastap Santo onlaın oqýǵa arnalǵan Laba kýrsyn ashty. Munda qoldanýshylar qarjy, satý, taldaý, marketıng, PR, basqarý jáne bıznes baǵyttary boıynsha 20 túrli dáris tyńdaı alady. Kompanııa ınnovasııalyq ıdeıalardy damytýǵa arnalǵan Leonardo jobasyn da qolǵa aldy. Bul jobaǵa sáıkes kez kelgen adam kompanııa jumysyn jaqsartýǵa baılanysty óziniń ınnovasııalyq ıdeıasyn júzege asyrýyna bolady. Leonardo jobasynda kóp daýys jınaǵan 5 qyzmetkerdiń ıdeıasy jeńimpaz dep tanylyp, qazir olardy naqty iske asyrýǵa jumystar atqarylyp jatyr.
Kompanııa zaýyt aınalasynda turyp jatqan jaǵdaıy tómen otbasylarǵa áleýmettik kómek kórsetip otyrady. Kásiporyn «GO WEST!» jobasyn bastady. Sonyń kómegimen Orta Azııada farmasevtıkalyq habtyń qurylýyna, ǵylymı-zertteý, synaq alańyn ashyp, Eýropalyq odaqtyń sapa sertıfıkatyn alýyna jaǵdaı jasady. Negizgi jospar – dárilik preparattardy Eýropalyq odaq naryǵyna eksporttaý. Santo Polfarma tobyna kiretin basqa da kompanııamen birge Eýropalyq odaqtyń ýákiletti organynan ruqsat alyp, Qazaqstanda sıtaglıptın dárilik ónimniń óndirisin bastamaq. Bul dárilik preparatty qoımada saqtaý, tasymaldaý da bizdiń elimizde júzege asady. Tıisti qujat 2024 jyly qolǵa tıedi. Osylaısha, «Hımfarm» Orta Azııanyń farmasevtıka tarıhynda birinshi ret Eýropalyq odaqtyń ınspeksııasynan ótip, sapa sertıfıkatyna ıe bolǵan kásiporyn atanyp otyr.
Zaýyttyń shejiresine qysqasha toqtalsaq, orys generaly M.Chernıaev elimizdiń ońtústigin jaýlap alǵan soń Shymkent qalasy Túrkistan general-gýbernatorlyǵynyń Syrdarııa oblysyna qaraıdy. Sol tusta ońtústik atyraptyń shuraıly jeri men aýa raıyna qyzyǵyp orys pereselenderi qonys aýdara bastaıdy. Ol kezde Shymshahardaǵy ózen boıynda jýsan kóp ósetin. Onyń emdik qasıetin jaqsy bilgen orys kópesi N.Ivanov orynborlyq kópes P.Savenkovpen birge 1882 jyly tuńǵysh ret ishekqurtqa qarsy santonın dárisin shyǵaratyn zaýyt turǵyzady. Zaýyt qurylysynda kópester kúıgen kirpishti qoldanǵan. Al tóbesin temir qańyltyrmen japqan. Bul zaýyt osy kúıinde bir ǵasyr boıy saqtalyp turǵan. Santonın dárisin óndiretin kásiporyn birneshe ǵımarattan quraldy. «Pýtevye ocherkı» eńbeginiń avtory P.Shreıder zaýytta 50 shaqty adam jumys istegenin aıtady. Olar negizinen jergilikti qazaqtar bolǵan. «Olar túıeni qalaı ońaı basqarsa, kásiporyndaǵy túrli mashınany da sondaı epshildikpen júrgizetin», dedi avtor. Bir qyzyǵy sol dáýirde ońtústik ólkesinde shyǵarylǵan taýarlar tek jergilikti tutynýshylarǵa arnalǵan. Tek santonın dárisi qazaq dalasynan tys elderge eksporttalǵan. Kásiporynda jylyna hımııalyq taza 2 myń put santonın óndirilgen. Shymkenttiń dárisiniń sapasy joǵary bolǵany sonshalyq, ol Japonııa, Úndistan, Germanııa, Anglııa elderine deıin jóneltiletin. Sonyń nátıjesinde zaýyt ondaǵan jyldar boıy úzdiksiz jumys istep turdy. Al keńestik dáýirde kásiporynda negizinen ósimdikten jasalǵan dáriler men esirtki preparattary shyǵaryldy.
1993 jyly «Hımfarm» aksıonerlik qoǵamǵa ózgerip, táýelsiz Qazaqstannyń tusyndaǵy alǵashqy otandyq farmokologııalyq zaýyt boldy. 2011 jyly polshalyq Polfarma kompanııasynyń tobyna enip, ınvestısııanyń kúshimen zamanaýı úlgidegi jańǵyrtýdy basynan ótkeredi.
ShYMKENT
